【緊張華仔情況】試過拍騎馬戲遇險 薛家燕:同動物拍嘢都危險

更新時間 (HKT): 2017.01.20 13:51
攝影:曹家誠
(蘋果日報)

薛家燕、曹永廉、梁烈唯噚晚喺荃灣出席仁濟慈善晚宴,家燕姐好緊張咁同傳媒華仔嘅最新情況:「我諗係裂咗,尾龍骨(編按:盆骨撕裂)要小心啲,做藝人同動物拍嘢都危險,我喺十幾歲試過拍策騎戲,本來慢慢行,突然間亂跑,畀棵樹勾住咗個古裝髮髻,如果低啲我個頭都冇咗。」

曹永廉雖然喺大台頒獎禮攞咗「最佳男配角」,但係忙拍劇冇機會搵真銀,連佢自己都話蝕咗,不過喺新年後,佢會同家燕姐、小田哥、同埋湯寶如主持節目,仲有機會唱歌,歌手出身嘅阿廉唔知會唔會唱番自己啲歌:「應該唔會,都冇人聽過。會唱啲經典歌。」咁不如唱蕭正楠嘅歌?佢好抵死咁話:「都冇人識,佢啲歌都唔hit,哈哈。」

即將做老竇嘅梁烈唯,最近忙登台搵奶粉錢,佢話:「o依家唔敢亂使錢,鍾意嘅嘢都唔敢買。」仲話阿BOB送咗好多衫畀佢,阿廉即刻搞笑話:「聽講嗰個人旺,用佢啲嘢都會好運,我都想聞下阿BOB對鞋呀!」

娛聞樂陪你走遍全球追星,即Like「娛果」FB 專頁!
BannerBanner