性感Deep V唱《今晚夜》 49歲馬蹄露：好多人同我一齊過情人節

馬蹄露噚晚情人節喺屯門大會堂開騷，開場着住性感Deep V銀色長裙大唱《今晚夜》同《乘風破浪》，仲有好多藝人拍片支持佢開騷。

馬蹄露受訪時，預告成晚都會着得好性感：「造型師幫我準備咗好多套靚衫，舊年得一套性感，所以今次全部都性感，同埋做完呢個未必會再做，生個『BB』真係死咗好多細胞，好吃力，好多嘢都要自己做，本來肥番但今日都瘦番，好彩有我姪仔馬米高幫手。」

情人節開騷，馬蹄露爆單身話已經飛咗之前個外藉男友：「好多人同我一齊過情人節，我係好開心，我媽咪、家姐、細佬都有嚟，但我阿嫂身體抱恙，驚多人有菌所以嚟唔到，我知佢有心，希望佢快啲好番。」