【最新回應】《達明》海報下架 周杰倫承認有向環球反映

更新時間 (HKT): 2017.02.16 19:37

【新增內容】

《達明一派卅一派對》嚟緊下個月喺紅館舉行3場騷,但因為3年前黃耀明曾站上前線撐雨傘運動,佢嘅黃絲身份令演唱會搵唔到贊助,甚至連海報都要被下架!因為出現喺海報P圖上嘅某位藝人,怕被認為撐明哥撐黃絲,恐懼會打爛大陸市場嘅金飯碗,無形之手令海報消失!

有份喺呢張海報上出現嘅嫌疑藝人,而又符合喺大陸有好多工作嘅條件,包括有:曾志偉、周星馳、陳奕迅、黎明、劉德華、鄭秀文、周杰倫、梁朝偉等,呢件事擾攘咗幾日,大家紛紛估無形之手究竟係邊個?有最新消息傳出,呢位嫌疑藝人就係--台灣天王周杰倫。

現年38歲嘅周董出道17年,推出處男專輯《Jay》憑《龍捲風》唱紅中港台,出道至今唱片銷量逾3,000萬張,曾多次到大陸舉行巡迴演唱會,又為大陸節目《最強大腦》、《中國好聲音》、《大魔術師》擔任嘉賓,喺大陸擁有千千萬萬嘅粉絲。

對於有傳周董要求達明海報下架,《蘋果》向達明演唱會主辦環球唱片求證,環球CEO黃劍濤喺電話表示:「我唔會答邊個,真係唔答得,因為應承咗人,就算問係咪A、B、C都唔會答,我唔想畀人亂估亂砌,出面講咗好多個,我都唔會答,唔會否認。」問到係香港還是台灣藝人,係男定係女?黃劍濤封嘴:「都唔講得。」

問到達明演唱會有冇嘉賓?請唔請到歌手做表演嘉賓?黃劍濤話:「暫時應該好似度緊,但未落實。我覺得音樂就音樂,唔好扯埋政治講。」

而台灣《蘋果日報》問過周杰倫嘅杰威爾音樂表示:「此海報屬於商業宣傳,使用周杰倫肖像和改圖未事先知會或得到本公司同意,因此本公司基於保護及尊重藝人權益立場而向主辦方反映。」

娛聞樂陪你走遍全球追星,即Like「娛果」FB 專頁!
BannerBanner