【公司稱稍後公佈】吳婉芳丈夫胡家驊猝逝 媒人曾志偉心痛:好唔開心

更新時間 (HKT): 2017.02.24 20:47

86年港姐亞軍兼最上鏡小姐的吳婉芳(May)於1993年拍拖7年的富商兼馬主胡家驊拉埋天窗,婚後退出娛樂圈,婚後育有兩子一女,今日傳出吳婉芳老公、55歲胡家驊健康欠安,更驚傳死訊。據殯儀業人士透露,胡家驊家人親自找香港殯儀館蕭老闆辦理胡家驊後事。

吳婉芳與胡家驊的媒人曾志偉今晚到尖沙嘴出席電影工作者總會春茗時,表示已得知胡家驊死訊,他說:「當然知,好唔開心。」被問胡家驊是否患重病?他皺一皺眉後說:「點會覺得佢有病,冇呀!佢(周日)咁靚仔出嚟,邊度似有事,所以…唉…今年冇見過佢,我都係剛才出嚟先知。同佢超級friend,知道呢個消息,好唔開心。」

志偉又稱:「一啲都唔覺得佢係會有病,平時出嚟都冇事,大家認識咗好多年。」

《蘋果》曾透過WhatsApp向吳婉芳求證,不過她下午3時58分查看消息後,並未有回覆。記者再致電胡氏家族生意、胡家驊任董事的騏利企業,電話接駁到他的秘書,記者稱收到傳胡家驊身體離世之消息,向其求證,秘書表示:「唔好意思呀,我哋暫時都未有住,佢哋遲啲會有資料會發佈㗎啦。我諗都係等佢哋先啦。」記者追問是否真有其事?秘書說:「你等佢哋消息啦,好嘛?唔該晒。」咁何時會有消息公佈?秘書稱:「我唔係當事人,我o依家仲聯絡緊,唔知道。」

本報亦問過吳婉芳好姊妹梁佩瑚,但她表示不知道:「我唔知呀!都搵唔到佢。」有否聽聞胡家驊有病?梁佩瑚稱:「唔知呀!真係唔知呀!」

胡家驊對上一次露面,是2月19日與妻子現身馬場。吳婉芳婚後一直做少奶奶,較常現身的地方就是馬場,由於保護得好,次次現身皆令人驚艷。

胡家驊是胡兆熾家族後人,胡家由做「喜蓮牌」電髮產品起家,父親為胡寶星爵士,胡家驊有兩名弟弟胡家驃及胡家驄,胞妹胡家雯,同時為騏利企業負責人及中環士丹利街騏利大廈大業主。

其愛駒「喜蓮福星」曾於2008年Mercedes-Benz香港打吡大賽奪冠軍。胡家愛駒「喜蓮系」均是大賽常客,「喜蓮福星」、「喜蓮智星」等已退役,而現役「喜蓮獎星」、「喜蓮巨星」、「喜蓮彩星」及「喜蓮歡星」等同樣系出名門,愛駒「喜蓮獎星」於今年1月一場馬賽奪冠。「喜蓮獎星」將於本周日第三場出賽爭奪女皇銀禧盃。

娛聞樂陪你走遍全球追星,即Like「娛果」FB 專頁!
BannerBanner