【85歲都咁潮】WhatsApp群組吹水講時事 夏春秋:仲有戲癮

更新時間 (HKT): 2017.03.03 00:06

老人家最大欣慰,莫過於仔女出晒身,自己可以同老伴過吓退休後嘅舒適寫意生活。家住南區華富邨嘅夏春秋(冬叔),閒時會同朋友飲吓茶,同太太行吓超市,又或者同孫女陳是知(吳君如囡囡)到公園玩,優優閒閒咁過一日。

不過,雖然退休多年,85歲嘅冬叔今時今日依然緊貼時事新聞,更與唔同嘅朋友開WhatsApp群組約出嚟飲茶傾偈。冬叔話:「自己咁多年識落好多朋友,有歌唱界、娛樂界,咁得閒會約佢哋出嚟吹水,知吓身邊發生緊嘅大事,好似林鄭高票入閘呀,劉鑾雄分身家呀,王衛(順豐創辦人)身家追過李嘉誠呀,呢啲都要知嘛!咁我o依家有長者優惠,去到邊都係兩蚊,趁行得走得,咪出去行吓走吓囉!」

諗起六合彩,好多人諗起冬叔,一到新年重播嘅賀歲片,又會諗起冬叔,問冬叔今時今日仲有冇戲癮,佢答得過癮(學佢搞吓爛gag):「90歲都有戲癮啦,問題係夠唔夠氣啫!o依家啲戲套套都上大陸拍,以前君如就話拍賀歲片可以照顧埋我啫,o依家佢都好少接,上面啲嘢食又多假嘢,我o依家話就話好人好姐,不過都唔知健康狀況,醒到就第二朝啫,醒唔到就一世囉喎!」老人家嘅金句,句句精警!

冬叔果然十年如一,keep住咁風趣,佢話有時唔係自己想拍就拍:「我記性都幾好,譬如有時個心真係想拍,不過香港有幾多個台,無綫獨大、ViuTV又係嗰啲『炒雜碎』,o依家新開嗰個又未開唔知點,個奇妙認真奇妙都唔知點奇妙法,所以好難,拍劇都只係去無綫,但係無綫咁多人才,多你一個唔多,少你一個唔少,講老角色都大把喇!有時講機遇,冇機遇、冇機緣,你有幾叻都係假,好嘅千里馬都要有伯樂賞識,好似有個角色啱你俾你玩吓,咁先有火花o架嘛!」冬叔人老咗,轉數仍然好快,講嘢亦夠晒啜核!

娛聞樂陪你走遍全球追星,即Like「娛果」FB 專頁!
BannerBanner