【紀念唐滌生100歲冥壽】仙姐:佢嘅劇本現今已冇人能及

更新時間 (HKT): 2017.03.03 15:58
仙姐與愛徒陳寶珠、梅雪詩一齊為粵劇《蝶影紅梨記》圍讀。(攝影:羅慧敏)
(蘋果日報)

陳寶珠、梅雪詩同師傅白雪仙,今日喺銅鑼灣為7月13日公演嘅粵劇《蝶影紅梨記》圍讀,今次仙姐挑選此劇,係為咗紀念著名粵劇編劇家唐滌生100歲冥壽,據統籌高太講,原本佢哋想同時賀仙姐嘅90歲生日,有雙重義意,但遭仙姐一口拒絕,因為仙姐計西曆,下年先90歲咁話。

仙姐今日聯同6位台柱,包括彭熾權、廖國森、陳寶珠、尤聲普、梅雪詩、任冰兒一齊亮相,問到佢兩位徒弟適合演此劇嗎?仙姐話:「希望啦!」問佢要求係咪好高?仙姐風趣咁話:「個個人要求都高,唔通要求低咩!」而提到紀念唐滌生,仙姐話:「 我哋不論何時何日何地都紀念住佢。我感受太多,佢嘅劇本寫到唔會用直接說話講,係用好靚嘅比喻方式,唔會唔記得曲,佢一定帶動到下一句,呢個係佢嘅絕招。」仙姐仲話唐滌生嘅劇本創作,現今已冇人能及:「除咗佢你哋諗唔諗到邊個有4分之1個佢咁好?希望諗到,咁對粵劇界好大幫助。」仙姐最後仲勉勵演員,演任何劇本都要代入、忘我,咁先係演員成功嘅必要之道。

而寶珠姐就話今次《蝶》劇喺文化中心公演17場,唔會加場,仲計劃去澳門演出,佢話:「都緊張,因為未演過,要花多啲時間排練」。

娛聞樂陪你走遍全球追星,即Like「娛果」FB 專頁!
BannerBanner