【獨家】傳29歲方媛懷孕兩個月 51歲郭富城下月中結婚

更新時間 (HKT): 2017.03.27 18:56

51歲天王郭富城(城城)自爆想結婚,《蘋果》記者今日獨家發現城城同29歲大陸網紅方媛(Moka),於3月4日已秘密喺香港入紙註冊,最快3個月內完成手續,計一計最遲6月初就拉埋天窗。

《蘋果》記者致電恭喜城城,佢話:「謝謝,我在工作晚點回。」目前佢身在武漢開工,聽日佢就要返無錫拍戲,估計下月中先拍完,跟手5月就出發去加拿大拍莊文強套新片。即係城城得4月最得閒,據知佢哋將喺下月中喺香港結婚。

睇番張結婚通知書,Moka報稱未婚,職業係fashion designer(時裝設計師),二人報稱同住跑馬地大坑道寓所。有消息指Moka已懷孕兩個月,如屬實,城城今次真係雙喜臨門,可喜可賀!

日前有位大陸網民爆下個月會嚟香港飲城城同Moka嗰餐喜酒,而《蘋果》之前問過城城經理人小美,佢話呢個係規劃喺今年內發生,城城都話結婚係人生另一頁,希望得到大家嘅祝福。

據知城城今次想結婚主要原因係媽咪年紀大,希望城城早啲娶老婆,恨抱金孫,友人推測佢嘅婚禮應該低調進行,一切從簡。

娛聞樂陪你走遍全球追星,即Like「娛果」FB 專頁!
BannerBanner