【亞視熄機一周年】《今日睇真D》斬件播外星人 盧希萊:咁做對個節目冇壞囉

更新時間 (HKT): 2017.04.01 20:11

唔知大家仲記唔記得,當年亞視有個節目叫做《今日睇真D》呢?唔記得,唔緊要,但講到解剖外星人,大家可能就會有啲印象,都唔記得,好,同大家一齊回帶。

95年,亞視獨家買到一家外國公司嘅「美國羅茲威爾在1947年美國國慶日,發現外星人後的解剖過程」紀錄片,為咗隆重其事(但應該係用嚟打對台嘅《城市追擊》,應該係,除非唔係...),亞視就安排咗喺節目《今日睇真D》到,分開一連五集播出,仲搵埋主持人去到美國羅茲威爾採訪,及於節目內舉行討論會等,由於當時每日斬件咁播放,所以都真係引起好大嘅迴響,正評同負評都有啦!

今日亞視已經熄機,但亞視團火從未熄過,今日部份亞視藝員就約埋喺佐敦一間酒樓,紀念亞視熄機一周年飯聚,當年有份參與解剖外星人嘅《今日睇真D》主持盧希萊都有出席。佢就講番當年加入亞視嘅經過。佢話:「當年民運其間返港,就去咗報讀亞視第一期訓練班,當時劉天蘭就係掌管形象,同期同學就有歐錦棠、萬斯敏等。」

盧希萊就話當時劉天蘭話要力捧佢,想佢做主持,就係咁佢就有機會做咗《今日睇真D》嘅主持喇!但係盧希萊就笑自己唔乖(健康),仲差啲腦膜炎死添,逃出鬼門關嘅佢,好彩亞視都繼續重用佢,所以佢就有機會主持到當年解剖外星人嘅環節,仲分開五集播放。記者提到當年好多負面新聞喎?盧希萊就話:「我自己諗番,咁做對個節目冇壞囉(斬件式播放),亦都係一個美好嘅回憶!」

娛聞樂陪你走遍全球追星,即Like「娛果」FB 專頁!
BannerBanner