【劉鑾雄講大劉(6)】聘福臨門廚師為家廚 大劉狠批昔日飯堂:依家唔啱胃口!

更新時間 (HKT): 2017.04.02 00:50

曾幾何時,福臨門是大劉一家的「飯堂」,曾有報道指,大劉每年在福臨門消費約四百萬元,每日平均吃一萬元。

自患糖尿後,大劉口味轉清淡,菜式少6成鹹度、少7成糖份,更轉場到半島嘉麟樓、中環唐人館用膳。

以為大劉已經捨棄福臨門?

錯。

大劉是將福臨門廚師「私有化」,聘請做家廚。

「好多廚師都有個通病,百分之一千都唔試食物,都係識煮唔識試,同埋佢哋都唔識食,佢哋嘅習慣令佢哋永遠去唔到最perfect境界。」付得起錢,也要識食。出名要求高、樣樣都要最好的大劉,對飲食極講究,更自封是「專家中的專家」,他說:「中菜、西菜我都識煮,你(即大劉本人)出去讀書,唔係依家環境咁好,唔通你日日出去食西餐、酒樓同九大簋咩?都係自己煮。」

「初初跟廚房工人睇下學下,到11、2歲已經好識煮餸。我食飯時間唔正常,有時兩、三點,有時三、四點,初初可能搵啲凍飯、打啲雞蛋落去,再加啲豉油、魚露炒炒下,結果越炒越純熟。」

愛在家開餐的大劉,家常便飯會有十幾個餸:「如果請客,就有20、30個餸,乜嘢餸都有,好似鹹牛脷、牛仔骨呀、中式牛柳。我鍾意食唔同嘅嘢,唔係淨係食貴嘢,反而魚翅、鮑魚、寮參我就普普通通,請客用,我自己麻麻哋。」

大劉亦嗜甜,喜愛各式中西甜品,包括Zoë Cake,該店亦特別為大劉調配減糖口味。近數月大劉因糖尿問題,已經戒吃,但仍會幫襯,買來送給深水埗區的小朋友。

娛聞樂陪你走遍全球追星,即Like「娛果」FB 專頁!
BannerBanner