【買飛請早】《風雲》舞台劇後日開 $980連坐9張仲買到!

更新時間 (HKT): 2017.04.04 13:52

由鄭嘉穎、謝天華、呂良偉同譚耀文等大堆頭演出嘅《風雲5D》音樂劇,去年7月已做定宣傳,原定4月1號開始於紅館上演,點知到2月15號突然宣佈延期,最令人驚奇嘅係,演員譚耀文都係早兩日至知延期消息。

咁延期成點呢?4月1號同2號場次,順延至同月15、16號舉行,其他場次包括4月6、7、8、9號四場就不變。換言之即係後日頭場。

大會都好識做,向4月1同2號嘅觀眾致歉,可換取《風雲》紀念品一份。至於點解要delay?總監陳淑芬就解釋謂:「經過技術部門連日開會,希望將呢個5D效果可以做到最好,亦希望可以有多啲時間綵排。」好喇,開場在即,啲飛去成點呢?

去城市電腦售票網一睇,似乎………如果你想買飛嘅話,仲有好多揀位機會喎。

票價分$350、$550同$980三種,實測試過,由4月6號頭場,試買$980飛,你買5至9張連座都有位。最平嘅$350,想6個人齊齊坐,依家仲有飛賣。

再試埋其他日子,好似4月9號,連位$980,買7張冇問題。

16號尾場,買連位10張$350,一樣有交易。想幫14個朋友買$980?分兩行坐,一樣有交易。

唔知到時入座率又會係點?

娛聞樂陪你走遍全球追星,即Like「娛果」FB 專頁!
BannerBanner