【秘交6年】鄭俊弘《星夢》彈出提分手 姜麗文:佢紅咗先飛我

更新時間 (HKT): 2017.04.05 13:15

33歲嘅鄭俊弘(Fred)因為參加大台嘅《星夢傳奇》而彈出,之後佢就好保護自己形象,感情事當然絕口不提啦,好似佢同秦沛囡囡姜麗文(Lesley)嘅6年情,一直以來都係喺地下發展,直至15年姜麗文眼濕濕同傳媒講話同Fred年幾冇見,話佢哋分開咗年幾,戀情曝光之際,亦係正式終結嘅時候!

15年有報道話姜麗文身邊嘅好友力數Fred,話佢因為紅咗先撇姜麗文,搞到姜麗文當時情緒好低落。報道是咁講的,Fred於加拿大讀書時已經認識姜麗文嘅哥哥姜文杰,後來返到香港就識埋妹妹姜麗文,好快佢哋就拍拖,但姜麗文當時喺日本已經有啲知名度,工作機會比Fred多,姜麗文完全唔介意之餘,一有機會仲帶挈Fred,知情人士話:「幾年前有間保險公司春茗請咗Lesley,Lesley就不斷游說個老闆請埋Fred,話幾多錢都冇所謂,最緊要畀個機會佢,結果真係請埋Fred,點知出張poster阿Fred好大個頭,Lesley連影都冇,追問之下原來係大台搞鬼,大台知道佢哋拍拖,唔鍾意佢哋同場,就施壓唔畀出Lesley個樣,Lesley嬲到殺入TVB理論,後來至有番個頭仔咋!」

直至Fred喺《星夢》一鳴驚人後,姜麗文就以為自己守得雲開,點知Fred就開始疏遠姜麗文,又以忙為理由減少聯絡,仲先後同吳若希、蔡思貝等人傳緋聞,到14年,Fred仲然突然向姜麗文提出分手,知情人士話當時姜麗文完全接受唔到,情緒近乎崩潰,仲曾經好激動咁同閨密講:「佢(Fred)紅咗先飛我!」但當時姜麗文就回應話尊重Fred嘅決定,同話自己一路好欣賞對方嘅音樂才華,係佢Fans喎!

雖然報道講到Fred因為紅咗先飛姜麗文,然而Fred喺14年11月舉行處男演唱會時,相信當時同Fred已分手嘅姜麗文,仲帶埋爸爸秦沛支持Fred,當時佢哋仲嚟個台下「世紀擁抱」,相信呢對過氣情侶,並非如外界所言般關係惡劣。

而今日就有報道就話,Fred原來早於14年7月,喺一個遊船河活動入面,結識到富家女友beebs,之後即將女方私有化,15年7月尾Fred向女友求婚成功,準備做乘龍快婿。咦!翻查紀錄,3年前,咪即係差唔多話同姜麗文分手嘅時候,但鄭、姜嘅分手導火線係咪beebs,就只有當事人先知喇...

娛聞樂陪你走遍全球追星,即Like「娛果」FB 專頁!
BannerBanner