【勁減20磅現腹肌】鄭嘉穎出錢又出力 訂150壺燉湯慰勞台前幕後

更新時間 (HKT): 2017.04.06 20:00
鄭嘉穎為咗今次演出,努力操fit自己。

一連六場嘅《風雲5D音樂劇》今晚喺紅館開騷,飾演「步驚雲」嘅鄭嘉穎請咗好多好朋友捧場,好似有洪天明、莫家堯、胡杏兒,當然唔少得嘅仲有係女友陳凱琳同嘉穎媽媽,嘉穎話自己有心理準備媽咪會嚟睇,所以唔會覺得有壓力。

不過為咗今次嘅角色,嘉穎落咗唔少功夫,因為佢唔單止又跳又唱,仲會有大量嘅動作戲,於是乎佢喺1月已經努力keep fit,飲食方面亦都好節制,盡量少鹽少油少糖,餐餐白肉、粟米及蕃薯,成功勁減超過20磅,聽講仲操咗六舊腹肌出嚟添!但係因為佢喺舊年左腳嘅半月板做過手術,加上雙腳膝蓋都有受過傷,搞到佢喺排舞嗰陣都有影響,所以要keep住睇醫生。

日前嘉穎為咗慰勞大家,專登預訂咗150壺燉湯送俾台前幕後一眾演員及舞蹈藝員,等大家喺開騷前補一補。

娛聞樂陪你走遍全球追星,即Like「娛果」FB 專頁!
BannerBanner