【配角搶過主角】謝天華企大蝴蝶飛紅館 觀眾忍唔住笑出嚟

更新時間 (HKT): 2017.04.06 23:32

【新增內容】

由鄭嘉穎飾演步驚雲、謝天華做聶風的《風雲5D》音樂劇昨晚於紅館揭開序幕,陳凱琳、胡杏兒夫婦、宋熙年夫婦、楊小娟、狄波拉夫婦、黎瑞恩、張智霖夫婦、汪明荃、樂易玲、蔡一傑、蔡一智、關之琳捧場。開騷前傳出網上現割價潮促銷賣飛,但第一場有八成入座率。

8時半開騷,為該劇減磅練六嚿腹肌嘅嘉穎及謝天華打頭陣,獻唱一曲後,有兩劍從天而降到舞台,他們退後,鄭丹瑞(阿旦)則由四人抬出繼續獻唱,佢猛問觀眾有唔有型,黎耀祥一出場更獲掌聲,阿旦同祥仔都有對手戲。演雄霸嘅吕良偉就着住盔甲出場,仲有廿幾個兵陪住,真係好有霸氣,講到有霸氣,譚耀文出現由4個踩住電動車男dancer抬出嚟,仲幾唱得,又係好有霸氣。

成個舞台劇就真係好似《風雲》嘅漫畫咁,每part唱一兩首歌,甚少有對白,黎耀祥同閰奕格就最好,唱歌都唔會太生硬,但閰奕格嘅角色喺中場休息前死咗。謝天華跳舞都好流暢,不過打鬥嘅動作就生硬啲喇。其中有一幕就係天華企喺大蝴蝶上面,喺埸中間飛,配合佢長袍同長髮,但就有觀眾忍唔住笑。

中場休息嘅時候,觀眾就去咗搵杏兒自拍,而嘉穎嘅女朋友陳凱琳就同嘉穎媽媽,佢哋兩個就坐前後位。中場休息之後,大會就叫頭排嘅觀眾着雨衣,會有噴水嘅情節。下半場一開始,胡琳先首度着住湖藍色tube 露肩裙出場。

雖然閰奕格喺上半場死咗,但係下半場都仲可以見到佢,因為佢會喺鄭嘉穎嘅歌入面跳舞,仲戴上白頭紗。

去到尾段,台前就出現小水池,天華跳下水池炸水,觀眾又再一次忍唔住笑,嘉穎又落埋水,兩個男人喺水入面又唱又跳又格劍,天華仲不時踢起水花,最後胡琳帶住受傷嘅嘉穎離開,天華都落寞咁拎住把劍離開,譚耀文唱歌,現場就落雪,為呢個舞台劇劃上句號。完場後一眾演員上台謝幕,又行上前同觀眾揮手,譚耀文同鄭嘉穎仲有花收。

娛聞樂陪你走遍全球追星,即Like「娛果」FB 專頁!
BannerBanner