【蘋果VR實試】西九神秘過山車 停駛十四年原因大解密

更新時間 (HKT): 2017.04.12 17:38

【新增影片】

位於深水埗嘅西九龍中心,雖然只係一個小小嘅平民商場,但佢嘅人氣分分鐘勁過啲大型高檔商場!事關商場嘅9樓,有一架全港獨有嘅室內過過山車-天龍過山車。呢架過山車喺1994年開幕,直到2003年停駛。停駛14年,佢嘅傳聞一直都冇停過,一時又話佢會拆,一時又話會重開;而停駛原因更加係一個謎…究竟係咪因為死過人要停,又係咪因為過山車要留畀「阿飄」坐,所以要停而不拆呢?想360°感受一吓呢架天龍過山車極速感動?

其實呢架Made in Italy 嘅天龍過山車,圍繞商場嘅8樓同9樓,全程254米,最高時速可以去到每小時25公里。由94年開幕至03年停駛,超過200萬人次搭過,當時只要畀15蚊就可以坐足3轉。想當年有唔少名人﹑藝人都坐過,包括謝霆鋒﹑黎明﹑鄧麗欣等。就連大台劇<<先生貴性>>都曾經喺度取景,認真巴閉!車上嘅安全帶由Day 1已經有,並非好似網上傳聞所講,因為有人拗過出車外先至加設嘅。至於被誤以為係救生網嘅網,其實只係為防萬一有嘢跌落嚟去接住物件嘅啫。

一直流傳嘅鬧鬼傳聞,西九龍中心嘅公關向我地證實,當年鑑於美國有室內過山車發生意外,高層考慮過安全問題後先決定停駛,而絕對唔係因為死過人,佢亦再三強調天龍過山車運作期間,從冇發生過意外。至於曾經有網民目睹過山車「自己郁」,公關表示過山車仍然有機電署發出嘅牌照,商場每星期都會有專人做例行檢查,而隔一段時間更加會進行拯救演習o添。

天龍過山車係唔少8﹑90後嘅集體回憶,唔少人都好想佢可以重開。不過商場方面就賣關子,話唔知會唔會重開,但如果街坊嘅聲音夠熱烈,能夠撼動管理層嘅話,話唔定會重開喎!

娛聞樂陪你走遍全球追星,即Like「娛果」FB 專頁!
BannerBanner