白雪仙刪繁就簡改七次劇本 陳寶珠坦言對演出感壓力

更新時間 (HKT): 2017.04.18 16:26
攝影:陳慧安

陳寶珠和梅雪詩(阿嗲)將於七月會演出以《任白慈善基金》名義主辦,唐滌生戲寶《蝶影紅梨記》,一共十七場,今次由粵劇名伶白雪仙任藝術總監, 今日一眾演員 包括寶珠姐、阿嗲、任冰兒、尤聲普、廖國森等在仙姐率領下,在金鐘港麗酒店舉行記者會,劉兆銘、劉松仁和劉千石亦來捧場。

仙姐精神奕奕在台上和大家對答,首先話:「自己耳仔唔太好,不過會盡量解答大家。」被問為何會選《蝶影紅梨記》,仙姐話:「都冇乜點解嘅,如果我做《九天玄女》你哋又會問點解,我覺得唐滌生寫得好好,希望佢哋可以演好啲俾鍾意粵劇嘅人睇。今次劇譜改咗七次,刪繁就簡,希望大家都畀寶貴意見,善意批評。」

演出會否加場及移施澳門舉行?仙姐一切暫時未決定,要睇時間、埋條件,香港加場方面就有難度,因為戲院今次都好難先攞到期畀我哋,所以暫時冇把握。」大會就補充澳門方便傾緊演出,成數好高,不過如果成事會下年先舉行。

台下劉兆銘見仙姐好精神,踴躍發問今次會否做埋導演?仙姐話:「要到我就會講,自己睇到就會畀意見,會話畀佢哋聽,唔好話台柱,所以兄弟手足,兵、卒、宮女我見到有問題都會講,因為一台戲唔止得主角有戲,每個人都有戲,人係有靈魂,一定有感受,不論做大小,都希望盡自己心忘我做自己應該做位置,無論一兵一卒都有感受。」台下劉兆銘即大叫好感動,大家拍哂手,仙姐話衷心多謝大家支持。另外,尤聲普多謝仙姐給予個機,因為對上一次找他演出時,他身體抱恙,今次有仙姐督促必定要欣賞。

寶珠姐仙姐阿嗲三人一齊接受訪問,仙姐透露改七次劇本係做到去蕪全精,唔敢講係最好,自己有參與督導改劇本。問仙姐想唔想演出?仙姐好幽默笑笑口話:「你哋唔係嚇我吖嘛,你哋想睇我完蛋呀,我想做但心有餘力不足,你哋個個都知我幾多歲啦,一有時間會教佢地,唔敢話教,自己都學習中,學無止境,知無不言,言無不盡。」寶珠姐同阿嗲同聲表示:「仙姐你係教我哋唔係指導,係逐步逐步教我哋。」仙姐聞言互相頂咀話:「教同指導咪一樣,你哋鍾意點講好啦。」場面搞笑。

寶珠姐坦言對演出大壓力,希望演出可反映角色、性格內心,阿嗲話自己永遠做唔到仙姐要求,今次希望比以前吸收更多。問到有冇俾仙姐鬧過?寶珠姐話:「鬧先至係好,袋錢落你袋,先當你係徒弟。」仙姐語重心長話想佢地好啫。

娛聞樂陪你走遍全球追星,即Like「娛果」FB 專頁!
BannerBanner