【未輪到陳德彰】蔣志光幫Raidas和音
黃耀光:最先同佢傾

更新時間 (HKT): 2017.05.16 05:20

80年代組合Raidas雖然出道兩年、只推出1張EP《吸煙的女人》,同2張大碟《傳說》《Raidas ‘87》,但事隔30年仲有好多人搵番佢哋嘅經典歌嚟聽。而且有人仲會研究佢哋嘅歌、歌詞同成員,有說蔣志光係影子成員o添:「志光嗰陣時係我助手嚟o架,亦都係好朋友,我哋早前嘅工作係一齊做,係Raidas嘅時候佢冇一個主力嘅參與;編曲上,係我嘅idea但佢幫手做programme;而好多時候我哋兩個嘅聲音係比較協調,所以啲和音部份,全部都係我哋兩個唱o架。」而Raidas嘅大碟上面,蔣志光亦以「小光」之名擔任助理監製及混音工作。

Ken又話當年好多歌曲上都會問阿蔣攞意見,甚至乎係第一個聽,佢話:「好似《別人的歌》,因為我哋都曾經唱過酒廊嘛。」既然咁friend,點解一開初唔係同阿蔣參加《亞太流行曲創作大賽》繼而入行?「係同阿志光傾先嘅,大家想有個機會將自己專長發揮出嚟,參加比賽就最好,不過究竟邊個作曲呢?都係分散投資比較好,是但一個贏都好嘛!」佢仲透露當年解散Raidas之後,阿蔣都有提議另組組合,只係Ken有另一啲想法,唔太想喺幕前演出而告吹。

此外,林夕(夕爺)當年都係Raidas嘅鐵三角,皆因除咗黃凱芹填詞嘅《傾心》,全部歌曲都由夕爺填詞:「嗰陣時佢未叫夕爺啦,當初大家都唔認識,經朋友介紹,就寫咗我哋嘅第一隻歌《吸煙的女人》。我覺得個合作係好有聯系,有啲字佢覺得好嘅,但啲音唔係好夾嘅我會改音。」

娛聞樂陪你走遍全球追星,即Like「娛果」FB 專頁!
BannerBanner