【訓練班個個頹】有線幫攻陷大台 蔡淇俊:有啲人未知係邊個就做男一

更新時間 (HKT): 2017.06.23 00:02

一代新人替舊人,聽落欷歔但亦係事實。訪問蔡淇俊當日,地點喺荔枝角公園,以往無綫有唔少古裝片都喺呢度取景,當日《宮心計2》成班演員亦喺呢度進行拍攝,望着昔日同事東奔西走,忙過不停,蔡淇俊笑笑口話:「第1集《宮心計》我都有份拍!」笑容帶點苦澀。

璀璨變暗淡,箇中自有百般滋味,尤其當藝人要同公司續約時,所面對嘅冷言冷語,就更加點滴在心頭。蔡淇俊憶述當日情景時,對方劈頭一句:「唔夠錢使,搵兼職啦!」雖然係忠言,但聽落都幾「un」耳。蔡淇俊話:「當時聽到個心係會『嘩咗一聲』,點解會咁樣嘅。不過o依家出嚟做生意,明白公司要養咁多員工,係會咁樣嘅,咁當然每個員工都想公司俾多啲錢啦!」

講起現時大台喜用外援,蔡淇俊感受良多。「擺番喺藝人立場,當然會唔開心啦,訓練班出嚟嘅同學,都會問『點解唔俾機會我哋嘅』,點解有啲人突然走入嚟,都仲未知邊個,就做到男一、女一嘅?好多同事或師兄弟都會有呢個感覺。當時氣氛係有少少氣餒嘅,即係圍埋氣氛唔係咁好。不過自己做咗老闆後,都知道要提拔自己嘅人,有高層過咗嚟,就會帶佢啲人過嚟啦,其實好正常。既然有啲嘢自己控制唔到,惟有做好自己先,話唔定有一日睇中你呢!」

娛聞樂陪你走遍全球追星,即Like「娛果」FB 專頁!
BannerBanner