【祝福舊愛】見到朋友仔都生埋 30歲蔡淇俊:隨時成家立室

更新時間 (HKT): 2017.06.23 00:02

17歲入行嘅蔡淇俊,緋聞唔多,最熟悉嘅就只得陳自瑤(YoYo)一個,眼見舊愛結婚生女搵到幸福家庭,蔡淇俊強調大家係朋友,雖然已冇聯絡,但亦真心祝福對方。

講到自己,蔡淇俊就話暫時冇感情生活。「呢一刻冇,之前都有嘅,佢係圈外人,大陸女仔,拍咗年幾拖。」說時抓抓頭,笑得有點靦腆。

雖然仲係單身寡仔,不過,蔡淇俊已經準備隨時成家立室。「係有咁嘅諗法,都開始唔細啦,佛山嗰邊有啲朋友好多都好早結婚,差唔多年紀甚至細過我,都有個幾歲小朋友,見到佢哋都冇話有特別憧憬嘅,但都要ready囉,不過最先係搵多啲錢。」

對於鍾意嘅女仔外形,蔡淇俊好認真諗咗諗話:「勤勤力力,正正常常,溫溫柔柔,都可以啦。冇話一定要聽晒我話,咁最好獨立有主見啦。其實阿媽又冇俾壓力,屋企咁多兄弟嘅另一半,阿媽都冇過問。」

蔡淇俊長期留喺大陸睇住盤生意,自言1個月先返香港1次,搞吓啲瑣碎事。已經逐漸適應大陸節奏嘅佢,米線舖頭現時已具一定規模,但蔡淇俊話未必殺落香港。「太大風險啦,租金咁貴,置業?香港?好難買樓喎。」

娛聞樂陪你走遍全球追星,即Like「娛果」FB 專頁!
BannerBanner