【曼聯「92班」抵港】五小福現身 「萬人迷」碧咸嚟埋!

更新時間 (HKT): 2017.06.29 12:23

叱咤一時嘅曼聯「92班」傑斯、史高斯、加利尼維利、菲臘尼維利及畢特今日將會到港出席活動,唔少曼聯嘅球迷更係把握機會,一睹「五小福」嘅風采!

今朝一早,大約有近50名「紅魔鬼」嘅球迷現身機場,「五小福」所乘坐嗰班機喺10點10分抵港,不過一段時間,仲未見佢哋步出機場禁區,跟住有同機嘅乘客話佢哋喺另外一個閘口行出機場,結果現場啲傳媒即刻趕過去!冇耐終於見到「五小福」現身,雖然未見有太多保安同工作人員接待,但係情況亦唔算太混亂,史高斯同畢特最先現身,不過佢哋頗為低調,不時避鏡頭!

跟住一班球迷聞風而至,因為史高斯同畢特已經行得好前,於是乎大家嘅焦點擺咗喺傑斯同加利尼維利、菲臘尼維利呢對兄弟身上,佢哋嘅表現都算親民,全程俾fans捉簽名同自拍,哥哥加利仲越行越慢,同大隊保持咗一段距離!擾攘咗一輪之後,佢哋終於行到架七人車身邊,fans把握最後簽名嘅機會!

之後佢哋坐車去咗入住嗰間酒店,現場大約有10個fans等候,佢哋休息一陣之後,下晝2時30分會出席奧海城活動,傍晚再到紅磡出席電競活動開幕禮,到咗夜晚會出席贊助商嘅活動。(新聞連結: http://bit.ly/2s3Zsfd )

此外,有報道指身為「七小福」之一嘅42歲萬人迷碧咸,喺今早8點幾秘密到港,有傳碧咸將出席今晚「五小福」有份參與嘅私人晚宴做嘉賓,另傳碧咸聽朝將同「五小福」去曼谷出席另一活動。

娛聞樂陪你走遍全球追星,即Like「娛果」FB 專頁!
BannerBanner