【原來係坤哥師弟】唱「黃」歌巧遇林鄭落區 羅啟聰曾寫歌講教育制度

更新時間 (HKT): 2017.07.03 16:08
羅啟聰噚日喺中環busking,巧遇林鄭落區。

特首林鄭月娥噚日落區到中環荷李活道嘉年華,咁啱有「小鮮肉」自彈自唱英國樂隊Coldplay《Yellow》,林鄭未有聞「黃」色變,仲拍掌鼓勵㖭。(新聞連結: http://bit.ly/2tHBefc )

呢位「小鮮肉」歌手被《蘋果》人肉起底,佢叫做羅啟聰,今年24歲,2012年參加FACE UStar校花校草選舉,入咗校草5強,去年簽畀星娛樂做吳業坤師弟,計劃今年尾出碟。

3年前羅啟聰已經開始街頭演唱,一直喺銅鑼灣東角道唱歌,最近就轉戰中環街頭表演,對於噚日撞正特首落區,羅啟聰接受電話訪問表示:「之前我真係唔知,啱啱唱完《Yellow》最尾嗰句,佢就行到嚟我度,嗰吓我呆咗唔知乜反應,呢首歌講達唔到夢想嘅遺憾,講真我都好開心見到特首,唱到歌畀佢聽,又同佢握手。」

羅啟聰坦言自己對政治唔係好有意見:「自己都關心社會,但唔係好叻判斷對與錯,我每日一定睇新聞,o依家年青人比較迷茫同沮喪,希望呢個特首可以畀到我哋新希望,同埋希望佢可以買我嘅唱片,支持本地新人同音樂行業,香港音樂越嚟越灰,好多人唔聽廣東歌轉聽韓國歌,希望新任特首可以畀多啲支持文化藝術。」

羅啟聰有首歌《衰仔大學》講香港教育制度,點解唔乘機同特首反映呢?佢話:「噚日太多人,講唔到太多嘢,其實我都希望特首關注香港教育情況,因為香港學生讀書壓力好大,自己覺得學生可以注重多方面藝能發展,唔一定考高分就係叻人,首歌都係呢個意思,冇咒罵香港教育制度,只係講現象,o依家好多學生讀書唔開心。」

問到曾否參加過遊行?羅啟聰坦言:「有,不過唔多,我唔係好激進,但觸發到藝術同文化嘅嘢我會參加,好似當年皇后碼頭我都有去聲援,我覺得香港嘅文化係最大優勢,作為香港人一定要爭取保留。」

娛聞樂陪你走遍全球追星,即Like「娛果」FB 專頁!
BannerBanner