【獨家】 四萬勇闖紐西蘭14日 ViuTV主持養活8人豬仔團

更新時間 (HKT): 2017.07.10 00:01

能夠得到筆錢去旅行,事先更獲安排異性相伴同行,聽到都覺得係夢寐以求旅程,早前羅伊婷(Daisy)、趙詠瑤(Kimi)、劉秉賓(Match)同李建邦(Suzuki)獲選拔參與ViuTV全新節目《out筆豬仔團》,監製事前同佢哋講定旅費有60萬,但無講到係咩貨幣同用途,而旅程目的地係紐西蘭,佢哋已經急不及待答應。

日前四人齊齊相約喺紅磡接受訪問,分享早前豬仔團之旅,團隊安排Daisy同Match到訪奧克蘭,而Kimi跟Suzuki就到昆士蘭,旅程出發時,監製分發旅費時七除八扣就變成每組人分得四萬幾蚊,仲要養活每組內其餘六位工作人員嘅十四日行程,當刻便正式展開豬仔團旅程。

Match跟Dasiy經常單打對方,Match踢爆Dasiy似水貨客,喺登機櫃位前就地開喼執行李,Daisy又投訴Match無紳士風度,佢話:「我係動作特技出身,佢就係打功夫,事前預咗有街頭表演賣藝,夾咗就位打,點知佢去到下下都真打落嚟。」

荷包雖然無錢,但Match同Daisy完全唔慳,仲走去玩跳降傘,Daisy指高度越高收費越貴,佢哋揀咗最高萬八呎跳落嚟,點知隔離組,好細粒嘅Suzuki話:「早知等我去跳會平啲。」其餘三人即爆笑指高度並非指身高。

Suzuki有幸同女神Kimi同行,點知一出機場就遇上騙子導遊,抽走佢哋大部份旅費,但行程上只係不停坐車無任何安排,身材好嘅Kimi無奈要打工搵錢,問到係咪利用美色?佢話:「係操勞工作,執大型動物嘅便便,換取畀佢玩樂,因為Suzuki事前唔知我做嘢。」

另外佢哋到訪冰川時,Kimi想一圓喺冰川前影比堅尼相心願,Suzuki形容當刻震撼程度連續有冰塊崩裂跌下,Kimi話:「佢哋眼光唔係咁好,我好快著番衫,叫佢影相又唔係影。」Suzuki笑指當時震緊點影,雖然有艱辛過程,但Kimi同Suzuki都覺得喺葡萄園工作係愉快體驗。

總結旅程,Match最深印象係當地人友善一面,呢份感覺喺香港好難遇到。Suzuki話自己第一次同異性去旅行,令佢汲取到跟異性相處經驗。Kimi以往旅行離唔開東南亞,今次旅程令佢體驗到紐西蘭當地風土人情,Daisy同樣覺得感受學習當地文化,這有別於平日在港的忙碌生活,學會了放鬆享受時間。

娛聞樂陪你走遍全球追星,即Like「娛果」FB 專頁!
BannerBanner