【夏娃兒Season 2(三)】Model轉型做武打演員 楊柳青對自己身材有信心

更新時間 (HKT): 2017.07.21 00:00

夏天嚟到,楊柳青就話最愛陽光與海灘,閒時都會同朋友遊船河,或者去沙灘暢泳,當然唔少得係着比堅尼,佢直言對身材好有信心,佢話:「最近操得好勁,主要想自己身型、線條再靚啲,有番少少肌肉,平時我會健身、跑步,喺飲食方面都會食得特別清,最近都係食烚雞胸、烚西蘭花,或者蒸嘅嘢,味道以清淡為主。」

對於自己由模特兒轉型做主持,直至最近做埋武打演員,變化甚大,佢話:「我需要一啲時間去習慣,因為做模特兒都係擺甫士影相,拍下廣告就得,主持就要考口才、轉數、背稿,難度都好高。」做武打演員唔擔心被打傷?楊柳青笑言越驚就越容易受傷,但佢已經克服咗。咁點解唔選擇走性感路線﹖佢話:「我比較率直、爽朗、男仔頭,加上自己又捱得,意志力較強,而且個個女仔都咁靚,咁好身材,點樣可以突出自己呢,我又好鍾意睇動作片,覺得女仔識打係好有型,亦覺得自己幾適合,所以想喺武打方面發展。」佢表示除咗學中國武術外,仲有練泰拳、巴西柔術、騎馬、射箭等等。

娛聞樂陪你走遍全球追星,即Like「娛果」FB 專頁!
BannerBanner