【夏娃兒Season 2】Amanda S.師妹Emily的骰勻稱 似港姐譚小環

更新時間 (HKT): 2017.07.22 00:00

人有相似唔出奇,名模Amanda S.師妹劉思美(Emily),束短髮、身形纖瘦,驟眼望去好似港姐譚小環,Emily喺理工大學畢業後,佢想趁年青搏一鋪,於是就簽咗畀Model Genesis做全職模特兒,佢由做平面model開始,越做戲癮竟越大,好想跳入大銀幕。

30B上圍嘅「嫩版小環」Emily,唔係波濤「胸」湧型,但勝在的骰勻稱,笑容甜美。狂跳舞派嘅Emily性格活潑,四肢柔軟度高,青春活力充沛,佢着住三點式喺大浪灣跳跳紮,仲做咗好多高難度瑜伽動作,除瞓喺沙灘示範較剪腳,又一字馬,佢完全輕而易舉,越做越興奮。

Emily直認被友人講佢似小環,佢非常受落:「似港姐幾好呀,佢話晒係港姐冠軍,我最想似佢美貌與智慧並重,不過小環靚啲。」作為新人嘅Emily唔介意做別人翻版,佢相信觀眾慢慢認識加深咗,就可以做番自己。心多多嘅Emily話乜都想試:「除咗平面廣告,我想有機會拍吓MV同電影。」擁有一身好「舞」功嘅Emily,跳咗4、5年舞,佢話:「平日跳街舞多,都有跳hip hot,我一跳就好想郁,一班人一齊跳好開心,台上畫面又好靚。」手腳同身體好有節奏感同靈活嘅Emily,佢話有機會好想試吓做打女,90後嘅佢竟然係八十年代打女出身、影后惠英紅忠粉:「我好鍾意睇佢以前啲武打片。」為咗朝打女呢個目標,Emily話會多操練肌肉,今夏想練到擁有馬甲線。

娛聞樂陪你走遍全球追星,即Like「娛果」FB 專頁!
BannerBanner