【夏娃兒Season 2(五)】忌陽光怕出汗 宅女Elle想釋放自己

更新時間 (HKT): 2017.07.23 00:00

o靚模炎夏出沒,佢哋經常現身沙灘影相,衣櫃最多係三點式,今年再推出寫真集《Have a Love - Elle's 戀愛》嘅陳綽妮(Elle),佢話自己係怕熱怕曬,只愛暱埋屋企嘆冷氣打機。

做咗o靚模兩年嘅Elle,直認愛影相先入行,想趁青春留倩影,佢話每次影寫真,佢想畀唔同年紀嘅自己留個美好回憶。偏偏寫真集必有水着環節,忌陽光嘅Elle迫於無奈去沙灘取景,佢日前喺大浪灣接受《蘋果》訪問,Elle直率咁話:「我唔鍾意嚟㗎,我怕曬又怕出汗,只係工作先嚟,我鍾意留喺屋企嘆冷氣打機,所以我唔係宅男口中嘅女神,用宅女形容我貼切好多,我鍾意打機同養寵物,嘆住冷氣玩狗仔、玩貓仔。」Elle自爆可以不眠不休打機12小時,佢話:「有時9點食完晚飯,我可以打到第二朝10點,打完就攰到立即瞓覺。」雖然經常馬拉松式打穖,但Elle話純粹貪玩,好少打爆機,亦唔算高分。

Elle話有留意一班o靚模前輩,佢話:「當中我鍾意係DaDa(陳靜),佢靚女,身材好。」Elle都希望學佢借寫真集上位,轉投影圈,佢有信心演好潑辣妹:「我鍾意做死八婆,因為似番自己,平時心中想鬧嘅嘢,可以喺對白鬧晒出嚟,將心入面自己釋放出嚟。」Elle仲搞笑話要最好安排佢鬧C君:「我鍾意陸永,但C君成日蝦佢,所以有機會我想同陸永出番一口氣。」

娛聞樂陪你走遍全球追星,即Like「娛果」FB 專頁!
BannerBanner