【獨家】「認字特警」李天翔拍拖5年 入紙娶富貴女友

更新時間 (HKT): 2017.07.27 18:04

「認字特警」可以係萬能cap圖,上網見人打錯字就貼出嚟盡情恥笑。

「認字特警」都可以係兒童節目《閃電傳真機》嘅角色,佢每次出場,都拎住張幾奇幻嘅「認字特警證」,擺出一個幾搶風頭嘅pose,大叫「我係認字唔認人嘅認字特警。小心俾我捉字!」

「認字特警」亦係李天翔嘅代表作。

97年起喺擔任《閃電傳真機》主持嘅李天翔,之後做過《K-100》主持,又轉型成功有得拍劇,曾經有過一段「李天翔現象」,由早到晚都見到佢嘅身影,同時俾大台定型,做咗「御用強姦犯」。

嚟緊李天翔會多個身份喇,《蘋果》噚日發現今年41歲嘅李天翔(原名李志偉)同未婚妻譚寶怡已經入紙註冊,好快成為人夫,李天翔接受傳媒訪問,被問係咪同圈外女友註冊結婚?佢喺電話中有啲愕然咁話:「我啱啱係大陸返嚟,其實我哋都冇諗住公佈,你哋查到冇辨法。」李天翔透露與圈外女友拍拖5年幾,問到求婚過程?佢話:「冇㗎,大家有共識就結婚,其實我哋都幾倉猝。」咁係咪奉子成婚?佢就話:「唔係,只係覺得咁多年都應該畀番個名份人,咁始終人哋係女仔。但唔會大搞,我同另一半都係簡單嘅人,好彩雙方屋人企人都冇乜所謂。」

上年底有雜誌報道指,李天翔女友係位富家女,平時有投資房地產,試過轉賣凱旋門一次就賺過千萬,認真犀利。

娛聞樂陪你走遍全球追星,即Like「娛果」FB 專頁!
BannerBanner