【發放正能量】超蓮又出動派扇:我好驚啲人以為我做騷

更新時間 (HKT): 2017.08.17 15:22

何超蓮之前成立嘅Smile with us HK慈善組織,繼早前喺書展及動漫節派扇之後,今日美食節開鑼,超蓮又再出動,喺會展天橋派扇俾市民,期間有人大讚超蓮「好靚女喎!」亦有唔少人要求同超蓮合照。

唔夠半小時,超蓮同10多位義工們已經派咗1000把扇,超蓮話:「之前要開會,所以我嚟到都已經派咗7、8成。」提到獲得好多人支持,超蓮表示:「覺得好開心,希望畀大家都知道呢個慈善團體係幫人,我好驚啲人以為我做騷,所以有時啲活動係唔公開;由2月14日第一個活動到o依家,已經有600名義工加入,大家都好正面,原來香港都唔係咁負面。」問到之後有咩計劃?超蓮話:「9月、10月都有,9月會去內地孤兒院探訪,帶歡笑畀佢地,亦有諗去澳門、新加坡,不過咁多人去,都係一個責任,呢啲都係要安排下。」

今次成立呢個慈善團體,超蓮身體力行之外,仲有出錢,佢話:「經費同行政費係我出,好似整扇、曲奇餅、波板糖嘅成本都係我負責,其他人捐嘅錢係拎去幫助有需要嘅人。」出咗幾多錢?佢表示冇計到。問到賭王有咩鼓勵說話?佢話:「我送咗把扇同波板糖畀佢,佢點點頭,好開心!」有冇叫好友G.E.M.(鄧紫棋)幫手?超蓮表示:「有呀,今日原本JW(王灝兒)都嚟,但咁啱佢公司安排咗工作畀佢,其實好多朋友都好主動,唔使踢佢哋入會,佢哋都自動獻身。」

此外,對於好友G.E.M.噚日生日,前晚超蓮同成班朋友為佢搞咗個驚喜派對,佢話:「為咗撐佢,我留到凌晨三、四點,第二朝一早就返工。」

娛聞樂陪你走遍全球追星,即Like「娛果」FB 專頁!
BannerBanner