【細細個就見過佢哋】東東「失蹤」嚇壞親友 張繼聰苦捱30年入人生勝利組

更新時間 (HKT): 2017.09.05 00:02

事業嘅嘢,可以由好細個就發展,好似有唔少人,細個嗰陣得意可愛,被招攬做童星,一入娛樂圈,可能就做一世。當然,亦有人中途離場,轉行發展。

好似以往被叫做「謝繼聰」嘅張繼聰,一直唔聲唔聲,其實佢有「老行尊」嘅資格,張繼聰喺1984年,即係佢3、4歲左右,已經喺鏡頭前搵食,最出名嘅係佢拍嗰個「十五樓養的牛牛」嘅奶粉廣告。除咗廣告,佢喺1997年已經踩上舞台演話劇,其實演藝歷已經有30幾年。眨眼佢今年已經37歲,除咗搞音樂,近年佢演戲備受注目,又操得一身恨都未必恨到嘅肌肉,加上娶得女神謝安琪為妻,仲生到一仔一女,「人生勝利組」應該入得到。

仲有喺90年代喺大台兒童節目《閃電傳真機》中出身嘅童星「東東」張裕東(現名張預東),當年以其精靈趣緻外表備受注目,參演過劇集《烈火雄心》,以及《賭神3之少年賭神》同《風雲雄霸天下》等電影。到東東長大後,重返大台效力,不過就轉為配音員。雖然佢退居幕後,但係關注度仍有,好似舊年佢突然「失蹤」,搞到鄧健泓及蓋世寶等好友關心其安危,更要求東東喺facebook開live以證安全。(新聞連結: http://bit.ly/2vEy91d )

而喺亞視套人氣劇《我和殭屍有個約會》中,扮演殭屍仔「況復生」嘅童星張國權,已經28歲,並且已婚,佢不時喺Instagram同微博等社交平台,貼佢啲飲飲食食相,仲有唔少同老婆去旅行放閃相,睇嚟佢哋兩公婆好鍾意去日本旅行。

講起童星,仲有嗰個以冬菇頭可愛髮型配圓咕碌面豬上有個好大嘅酒窩、把聲沙沙哋嘅鄭柏林(小柏林),現年32歲嘅佢自大學畢業後,就加入警隊擔任督察,佢仲喺2012年12月同女友拉埋天窗(新聞連結: http://bit.ly/2gxEctK )。小柏林自3歲已經入行,演出10幾年後,自覺對娛樂圈興趣大減,所以冇再喺幕前演出,寧願發展其他興趣。

娛聞樂陪你走遍全球追星,即Like「娛果」FB 專頁!
BannerBanner