【韓流】Solbi跳到甩裙引爆笑 帶挈《RM》收視創新高

更新時間 (HKT): 2017.09.11 14:00

韓國綜藝節目《Running Man》噚日播出最新一集,邀請咗「OST女王」白智英、前女團Wonder Girls成員宣美、女歌手Solbi、韓劇《Oh My Venus》男星成勛等擔任嘉賓,同《RM》8位成員組合8隊,與製作組對決。

節目中,當新成員全昭旻與成勛組成一隊後,節目組立即邀請與宋智孝組成一隊嘅另一男嘉賓出場,仲介紹該男嘉賓係近期大勢男星,搞到智孝勁興奮地問「係咪Wanna One嘅姜丹尼爾」,節目組仲好有心機咁播出選秀節目《PRODUCE 101》首主題曲《Pick Me》(姜丹尼爾透過《PRODUCE 101》出道),點知一出場嘅係搞笑藝人曹世鎬,智孝立即勁失望。

另外,眾人組隊後要先透過性感舞蹈對決贏得任務費用,當中Solbi助興白智英嘅性感舞台時,卻唔小心踩到自己條長裙,搞到喺鏡頭前甩裙並露出打底褲,搞到其他人都嚇親,一片混亂,一眾《RM》男成員更立即擋住鏡頭,等Solbi整理好。雖然差啲造成中斷錄影,但就引得眾人爆笑,而Solbi就算甩裙都唔理,只係顧住自己可唔可以得到任務費用,獲唔少觀眾表示噚日嘅《RM》好有趣。

而多得Solbi嘅搞笑、宣美嘅性感舞蹈,噚日一集《RM》成為今年播出嘅集數中最高收視嘅一集,分別係5.9%及8.1%收視率。

娛聞樂陪你走遍全球追星,即Like「娛果」FB 專頁!
BannerBanner