【生在香港太富足?】劉小華初嚐無味木薯粉 感觸良多喊咗出嚟

更新時間 (HKT): 2017.10.20 15:53
劉小華試食無味嘅木薯粉,諗起貧窮孩子每日要食同一樣嘅食物,就忍唔住喊。

香港小朋友大部份都衣食無憂,生活富足冇乜捱過苦,宣明會早前就邀請咗8名港孩,親身體驗貧窮同戰爭地方小孩面對嘅苦況,包括逃避戰亂、淪為童工、乞丐、試食貧窮兒童食物等。

做過ViuTV節目《晚吹 - 一大一路》小主持嘅劉皓嵐(藝名劉小華)都有份參予,佢要食無味嘅木薯粉同「污水」,雖然污水只係用飲料模仿調製,但小華都感受好深,拍攝期間都忍唔住喊,佢話﹕「諗起佢哋(貧窮孩子)食嘅比呢啲更難食,而且每日都要食一樣嘅嘢。」不過小華都堅持食晒,希望喚起更多人關注,佢話﹕「想俾多啲人知,世界唔係只有我哋。」小華嘅媽媽話囝囝一向好小喊,佢話﹕「我都好驚訝,睇見小華經歷貧窮孩子所經歷嘅,有咁大感受,希望香港小朋友學會更懂珍惜,令世界更美好。」

娛聞樂陪你走遍全球追星,即Like「娛果」FB 專頁!
BannerBanner