【獨家】大台頒典禮延期下年舉行 合拍劇加入戰團分豬肉

更新時間 (HKT): 2017.10.22 00:30

每年去到年尾,又係派成績表嘅時間,大大小小嘅電視、電影或者樂壇頒獎禮相繼舉行,雖然認受性不及當年,不過對於有份參與嘅歌手或者演員嚟講,獎又點會嫌多呀?喺芸芸頒獎禮裡面,就算觀眾同網民點樣批評劇集嘅水準點樣下降,收視成績幾咁低,但係依然有唔少捧場客!

時間倒帶返到去97年,視帝視后頒獎當時只係喺《萬千星輝賀台慶》中以助慶形式出現,不過話晒嗰個年代百花齊放,劇集同演員質素都處於黃金時期,就算助慶反應當然都好好啦。去到06年,無綫決定將頒獎禮分拆成一個獨立節目《萬千星輝頒獎典禮》,不過近年小生花旦流失勁嚴重,收視成績每況愈下,連頒獎禮嘅成績都一年比一年差,舊年平均收視竟然只得27.6點,即係有約179萬觀眾捧場,成為歷史新低。(新聞連結: http://bit.ly/2it2kCr )

查實近年無綫喺劇集經常變陣,好似今年下半年播咗好多合拍劇,睇吓可唔可以招攬多啲資金同人才去救亡,喺其他方面亦都要變陣,呢個頒獎禮每年嘅12月中舉行,但係今年似乎有啲改動,據《蘋果》收到可靠消息,今年台慶頒獎禮將會順延到明年1月中舉行,正因為順延,所以連帶有份提名嘅劇集亦會相對地增加。

查實順延到明年1月中舉行嘅原因眾說紛紜,有指最主要係無綫之前人事大地震,珍姐曾勵珍以為自己一統天下,點知原來失勢,新任助理總經理杜之克插手入戲劇組,自組班底,搵咗好多舊人回巢,好多仲要係當日離巢轉投港視嘅人,加上嘗試同大陸合作拍劇,好似宣萱、林文龍回巢拍嗰套《不懂撒嬌的女人》都有口碑。為咗頭炮再響啲,當然要繼續省靚招牌,最好方法就係用獎項證明。

據知無綫今次將台慶頒獎禮延至1月,目的係為遷就李司棋、夏雨等主演嘅合拍劇《溏心風暴3》參加埋頒獎禮。事關呢部台慶劇喺下個月27號先推出,按慣例要等到出年先角遂台慶頒獎禮,但呢部劇話晒係劉家豪回巢第一炮,加上無綫對呢部劇好有信心,希望造大啲個聲勢,令台慶頒獎禮都熱鬧番,力挽舊年收視創新低局面,所以決定延期。

而被喻為無綫台慶頒獎禮前哨戰嘅《星和無綫電視大獎2017》,噚晚喺新加坡舉行,結果由王浩信同李佳芯成為視帝同視后獎項,究竟呢個賽果仲可唔可以視為台慶頒奬嘅得獎指標,咁就真係有所保留喇。

娛聞樂陪你走遍全球追星,即Like「娛果」FB 專頁!
BannerBanner