【幾夾都要分手】與野人再見亦是朋友 38歲崔建邦又有新歡?

更新時間 (HKT): 2017.11.03 15:40

崔建邦噚晚突然喺ig宣佈同林珊珊女兒李怡(野人/Tiffany)分手,今日喺尖沙咀為「十大最受歡迎演唱會頒獎禮暨樂壇頒獎禮2017」擔任司儀,面對傳媒追訪,崔建邦明顯有備而來。

問有冇影響心情?崔建邦話:「又冇喎,但我好珍惜呢段關係,Tiffany係好好嘅女仔,之前喺網上寫咗一次文章,今日見記者再講一次,之後唔再回應。」

崔建邦坦言兩人公開結束關係,係因為近日不停有報道指兩人會結婚,佢話:「結婚唔係真嘅,唔想沒完沒了俾人講,所以噚日出嚟講,唔想再有揣測。」崔建邦透露同野人分開咗一段時間,但就冇確實講分咗手幾耐,佢話:「總之一段時間啦。)邊方提出?)我哋係有共識,大家好珍惜呢段關係,嚟緊會努力工作。(拍拖時唔夠努力?)係大家希望停一停,當中有努力經營呢段感情,我哋係好朋友,希望大家俾啲空間。」

一直有傳林珊珊唔鍾意崔建邦,佢咁解釋:「唔關外在因素,任何人事。」有傳係24歲嘅文青新女李靖筠(Gladys)介入,崔建邦只搖頭不語。

舊愛唐詩詠對兩人分手好愕然,崔建邦話:「吓,點解嘅,我都唔知,但我都好突然,正如你哋知我哋分手都好突然啦。(係咪再見亦是朋友?)一定。(受過感情重創?)又冇,我支持佢玩瑜伽,佢都支持我打拳,好多謝我生命中有呢個人出現。(咁你哋幾夾吖?)係咪呀?」記者追問係咪行唔到落去?崔建邦冇回答便結束訪問。

而李靖筠(Gladys)今日回覆《蘋果》時否認戀情,佢話:「唔係事實呀 我同佢本身唔太熟,我都唔知點解會傳咗件咁嘅事。」

此外,得獎名單包括有《風雲5D音樂劇》奪最佳舞台創意及特技效果大獎、陳淑芬更亦得「演出業榮譽貢獻大獎」、許冠傑同譚詠麟嘅《阿Sam&阿Tam Happy Together》演唱會、以及周柏豪嘅《ONE STEP CLOSER演唱會2017》就獲「年度最受歡迎演唱會」。

娛聞樂陪你走遍全球追星,即Like「娛果」FB 專頁!
BannerBanner