【扮劉德華】藝名係「腦細」改 劉小華鍾意專蝦細路仔嘅周星馳

更新時間 (HKT): 2017.11.14 16:46

今年9歲讀緊4年班嘅劉皓嵐,你哋可能唔知邊個,講起前年毛記「繁忙兒童合唱團」唱出《補充練習無間做》嘅劉小華,啲記憶即刻返晒嚟,最近佢幫青衣城同綠楊坊兩個商場拍咗首名為《劉小華荃青周圍跳》MV,宣傳一個日本玩具車仔嘅展覽活動,負責拍攝嘅仲係小華爹哋劉德然(Justin) 。

喺頒獎禮入面扮劉德華,不過小華話個名係「腦細」林日曦改嘅藝名,自然就唔識邊個係劉德華,佢話:「冇聽佢啲歌,跳舞歌會聽陳柏宇。」講到最鍾意嘅明星,就係專蝦細路仔嘅周星馳:「乜戲都睇,《食神》、《少林足球》囉好搞笑。」為咗表明佢哋兩父子都係星爺fans,兩父子即場夾咗首《少林足球》入面一場經典嘅唱歌場面。

講到facebook有page,小華話:「媽咪幫我run,我有時會上去,如果有乜嘢idea會叫媽咪放上去,跳舞嘅嘢或者有趣嘢想分享,都會放上去,好似上次第一次煮嘢食。」小華話唔算好多followers,大概6,000幾個。作為新生代自己知道乜嘢係KOL(Key Opinion Leaders),小華話KOL起碼人哋知你係邊個,熟悉某一樣嘢同人分享,佢話:「我最叻跳舞,打機都叻。不過應該未係KOL。」

講到同樣都係9歲嘅Celine妹妹(譚芷昀)已經衝出國際喺《American's got talent》唱出名堂,問到小華會唔會以佢為榜樣時,佢好得體咁話:「每個人都有自己嘅長處,佢用到自己嘅長處(唱歌)係好事,亦都唔應該做對比。」至於每位小朋友都有嘅「我的志願」,小華話:「我想做識跳舞嘅導演,即是可以自導自演嘅導演。香港好似冇一個識跳舞嘅導演,我做第一個。」

場地提供:青衣城

娛聞樂陪你走遍全球追星,即Like「娛果」FB 專頁!
BannerBanner