【鄭融胸壓全場】演唱會都有頒獎禮?姜皓文拎鑽石合唱金曲 阿姐竟然冇獎

更新時間 (HKT): 2017.12.09 11:10

盧巧音、連詩雅、鄭融、陳柏宇、夏韶聲及太極等,噚晚喺九展出席「十大最受歡迎演唱會暨樂壇頒獎禮2017」,鄭融著晒性感開胸裙現身,搶晒風頭。

咦,阿姐汪明荃呢?冇獎嘅?

嘩……姜皓文拎歌曲獎呀…恭喜晒!

講番鄭融,佢同密實打扮嘅連詩雅都拎咗呢個「鑽石非凡表現奬」,兩人仲一齊受訪,講到性感亮相,鄭融話:「今日大會主題係Elegant,所以盡量搵件配合嘅衫。」又表示外觀雖然好性感,但內裡已做足安全措施,完全唔怕會走光。

問同場嘅連詩雅可覺風頭被搶?佢話:「我都冇乜嘢可以露,最多咪騷吓腳同膊頭。」鄭融話間中作性感打扮無所謂:「最緊要睇場合,我要好感激形象設計,因為我得五呎高,其實好難襯衫,多謝設計師成日幫我襯到啲好靚嘅衫出嚟。」

即將舉行演唱會嘅盧巧音表示,日前跑步時右腳受傷:「噚日跑跑吓步嘅時候,右腳突然間好痛,要即刻返屋企,因為今日要出席頒獎禮仲未睇醫生。」問到老公Sammy知道未?佢話:「老公喺大陸做緊騷,未通知佢。」又稱原定要為新歌拍MV,但因為腳傷要暫時延期。講到舊愛余文樂結婚,佢話:「我都講過啦,好祝福佢。」會唔會親自祝福?佢話:「有機會見到咪會,始終係開心事。」

娛聞樂陪你走遍全球追星,即Like「娛果」FB 專頁!
BannerBanner