【狗仔出更】簡淑兒戀愛樣行銅記 男友唔耐煩連煲兩支煙

更新時間 (HKT): 2017.12.16 15:48

【新增回應】

女子組合少女標本成員簡淑兒(Jessica),目前作個人發展,數月前到電台宣傳新歌嘅佢,自稱未有男友,又話喜歡成熟暖男。不過,《蘋果》日前喺銅鑼灣就發現Jessica,喺短短幾個月已經揾到另一半,之但係......係咪佢口中鍾意嘅暖男型,就可圈可點喇!

即係咁,暖男基本條件,走唔甩「溫柔」同「體貼」,如果陪女友shopping中途,不停離場煲煙,仲發脾氣自行離隊,唔知合唔合格呢?

本月13日,大約黃昏六點幾,本報喺銅鑼灣HMV發現戴咗口罩嘅Jessica同一名男子行街,二人邊睇邊傾邊笑,點睇都係一對熱戀中嘅戀人,直至時間一分一秒過去,本來笑晒嘅男子就開始唔耐煩喇,喺Jessica逛咗大約半個鐘嘅時候,就要走出室外位置「呼吸」,一口氣吸咗兩支煙之後,先至施施然返回店內會合女友,咁Jessica唔高興就梗架喇,但男仔見女友仲未揀完,就o依o依哦哦咗一輪,雖然聽唔到佢講乜,但兩個人離開舖頭時就已經面左左,最後仲一個行先,一個行後,最後Jessica走咗入另一個商場繼續逛,本來跟喺佢後面嘅男子,就企喺門口等,全程都無入去,只係全程企喺度篤電話。

今次Jessica入咗去大約20分鐘,出嚟嘅時候似乎都消咗啖氣,相信男子篤電話都係氹番佢,之後兩個人齊齊去停車場攞車,男仔仲一度想伸手拖住Jessica,但唔知係咪人多,最後都縮番手。當日,男子駕駛一架09年出廠時價值40幾萬嘅AUDI接載Jessica,根據車輛登記資料,車主為一名翁姓男子,英文名叫Marcus。

Jessica被爆有新戀情,佢今日回覆《蘋果》時話:「嗰日唔係嬲,嗰位係朋友,我有啲唔舒服,所以戴住口罩。我手全程插喺褸袋,我係冇拖手嘅,只係嗰下角度似拖住,嚟緊都忙,會開新劇,多謝大家關心。」

娛聞樂陪你走遍全球追星,即Like「娛果」FB 專頁!
BannerBanner