【韓流】工會要求停止製作《和遊記》《九家之書》導演緊急加盟劇組

更新時間 (HKT): 2017.12.27 16:57
《和遊記》自首播以來爆出好多不利消息

由李昇基、車勝元、吳漣序等人主演嘅tvN新劇《和遊記》上周六首播後,收視高開達5.29%,不過播出第二集時卻出現災難性嘅播放事故,多次出現穿崩鏡頭,更加插近20分鐘廣告,令劇迷冇得原汁原味追劇,到前日聖誕節重播完整版第二集,收視錄得5.623%新高。

點知噚日《和遊記》又被爆劇組隱瞞有工作人員於拍攝期間發生意外一事,根據報道指工作人員A某於日前懸掛喺天花板上嘅吊燈時,不慎由3米高墮地,導致腰及盆骨骨折及脊髓受傷,又因受強烈衝擊而懷疑腦出血。而A某送院時情況並唔樂觀,出現下半身痲痺及沒有意識嘅狀況,幸而已經恢復意識。

而一個名為「全國言論勞動組織」嘅工會就要求電視台要停止製作《和遊記》,應該要徹查工作人員A某受傷事件後才可重新製作。

由於咁多不利消息傳出,令到《和遊記》方面都即刻想辦法解決問題,為免再出現播放事故,根據韓媒今日報道,相關人士表示曾拍攝韓劇《九家之書》嘅金政賢導演緊急被召喚加盟劇組,協助《和遊記》導演朴洪均一齊製作劇集,希望能夠解決後期製作等問題。

娛聞樂陪你走遍全球追星,即Like「娛果」FB 專頁!
BannerBanner