【大熱門】唔認被大台力捧做視后 李佳芯:會投自己一票

更新時間 (HKT): 2018.01.18 00:00

李佳芯(Ali)今年先後有《與諜同謀》、《踩過界》、《誇世代》出街,而佢今次喺台慶頒獎禮被睇高一線,其實佢早已經喺無綫兩大海外頒獎禮《星和無綫電視大獎2017》、《TVB 馬來西亞星光薈萃頒獎典禮2017》憑《踩過界》入面嘅角色王勵凡分別獲得「我最愛TVB女主角」及「我最愛TVB電視角色」。此外,佢又喺網站頒獎禮獲「人氣最愛女主角」睇嚟視后呼聲真係高。

不過今年台慶佢以《誇世代》嘅尚可瑤角逐視后,呼聲反而更高,成為今屆視后大熱Ali就話:「我唔知自己係唔係大熱,啲人一路都話我爆冷,但係之前一路都冇咩信心,最近好多同事都俾咗好多信心我,又覺得自己辛苦咗成年,咁用心做每個角色,所以我自己會俾番個credit自己,會投自己一票。」之不過有傳無綫想力捧佢做視后,Ali話唔係力棒只係多咗機會:「我唔覺得,從來唔覺得有被人力棒呢樣嘢,但係好開心喺呢兩年多咗好多機會,好似上年都冇停過拍劇,對我嚟講係好開心自己冇停過,但係從來又唔覺得係特別力棒。」

至於喺一眾有份提名嘅女藝人裡面,有冇睇好邊個,覺得係競爭對手?Ali就話:「其實好多都係前輩,我自己心目中係阿田(田蕊妮),因為佢喺《迷》個角色真係好好,換轉係我自己做真係唔知點做,想像唔到可以點處理,我覺得阿田係好叻,如果要投,我係會投俾阿田。」

娛聞樂陪你走遍全球追星,即Like「娛果」FB 專頁!
BannerBanner