【台慶頒獎禮】社交網打告急牌 王浩信背熟得獎辭:可以做嘅嘢都做晒

更新時間 (HKT): 2018.01.21 20:17

無綫嘅台慶頒獎禮喺今晚舉行,本來有傳王浩信今年攞硬視帝,點知因為緋聞影響,再加上《降魔的》嘅走勢又凌厲,o依家機會得番50/50。為咗捧獎夢唔好落空,王浩信出盡力拉票。睇得出,王浩信好餓呢個獎。

今晚行完紅地毯,問到王浩信今晚心情如何?佢就話都好輕鬆,因為所有可以做嘅嘢已經做晒,「依家反而係最輕鬆嘅狀態,可以去舔盡每一個難忘嘅moment。」王浩信同馬明都話好難得只有喺台慶先可以同一大眾朋友一齊聚首,今年仲有唔少朋友都係大熱,就算自己拎唔到都希望大家有收獲。

王浩信仲話特別係《踩過界》嘅各位拍檔,喺拍完之後都各自有新嘅進展,工作上忙到不得了,想約埋聚一聚都難,希望監製今晚有機會上台。佢又特別提到李佳芯同朱千雪進步不少。但講到佢本人封視帝機會十拿九穩,王浩信即謂:「唔好咁講唔好咁講,今晚有份入圍嘅都係非常有份量,咁……冇話邊個一定攞得到,但我覺得可以同佢哋一齊入圍係我嘅榮幸,今晚無論邊個攞我都開心嘅。」

「今年對我嚟講係難得嘅,因為今年啲角色,對我嚟講係比較……入心啲。咁今年可以做嘅都做晒,所以今晚我會盡情享受。」是否已袋好得獎「貓紙」?「背晒喇今年!五十周年對我嚟講係好重要嘅一年,我覺得處理任何對白,對我嚟講最難就係上台呢一段。所以我自己反反覆覆準備咗好多次。你依家見我咁輕鬆,就知啦!」

訪問嘅時候蔡思貝就話心情好興奮,最想《踩過界》可以攞到最佳劇集,又想王浩信可以攞到最佳男主角、張振朗攞到最佳男配角、朱千雪可以攞到最佳女配角。講到工作,思貝就話呢兩個月都係工作加跑步,今朝可以衝過自己預計嘅時間已經好開心。

娛聞樂陪你走遍全球追星,即Like「娛果」FB 專頁!
BannerBanner