【每間公司都有】汪阿姐山頭文化!宣萱:啱傾啲就覺得埋堆

更新時間 (HKT): 2018.01.24 14:51

「Mall姐」宣萱今日出席活動,佢解釋因為有工作在身,日前先冇去台慶頒獎禮,喺無綫工作多年,問佢點睇汪阿姐指「無綫山頭文化」,宣萱直言:「我有留意,我當年都ok,每間公司都有,唔只TVB,唔好話埋邊個堆,就算我喺度,我同邊個好傾啲,唔係因為我擦佢鞋,而係人夾人,啱傾啲,啲人就覺得我埋堆,所以鍾意講咩就講咩啦!」

有指宣萱當年係梁家樹(Tommy)黨,佢笑指:「我係被列入Tommy,我同Tommy真係啱傾,佢好似Daddy咁教我好多嘢,我鍾意Tommy,因為佢係做嘢嘅人,覺得藝人適合就會搵,唔係因為藝人送咩、o氹佢開心,唔會啱傾先用,我都講咗20幾年,我想嘗試其他嘢,我想做奸角,但佢冇俾我做,可能佢覺得我未係時候。」

問到佢演《使徒行者2》嘅Scarlett都係網民話題作,遲啲會唔會再同無綫合作,宣萱有啲猶豫咁話:「劇本啱都會,要睇吓同邊個去演,就算拍《使徒行者3》都要到時先算,o依家我係貴精不貴多,我覺得觀眾反應好緊要。」問及無綫叫觀眾投票,係咪覺得要公開票數?宣萱解釋:「我唔知呀,其實觀眾只係佔部份,公司有公司規矩,最終都係公司決定,演員係被動,去到就去,參與就參與,邊個攞到開心。」

娛聞樂陪你走遍全球追星,即Like「娛果」FB 專頁!
BannerBanner