【同人夫拉上關係】被指經常為王浩信買咖啡 江嘉敏:我已經盡量收歛

更新時間 (HKT): 2018.01.24 18:07

江嘉敏、許廷鏗同單文柔今日喺坑口出席「韓式唧花藝術展」,三人即場示範唧花,江嘉敏事後透露試過整蛋糕唧花,男友有咩評價?佢話:「我冇男朋友,係整畀屋企人食。」

對於有報道指,江嘉敏早前喺英國拍《兄弟》期間,主動撩男演員玩佢解釋:「呢套戲係打,唔郁手郁腳可以做啲乜,我個人比較活潑,男仔頭,粗手粗腳,麻甩咗少少。」

唔怕傳緋聞?江嘉敏就話:「我已經盡量收歛。」

講佢經常買咖啡畀王浩信,江嘉敏即刻話:「我本身唔飲咖啡,所以唔會買咖啡俾任何人飲,我喺片場有個稱號就係『零食供應商』,睇我微胖身形就知我好鍾意食嘢。」

提及有人爆料指江嘉敏同王浩信人前扮唔熟,但喺片場就互發短訊,江嘉敏為自己平反:「咩呀,監製先讚我工作時唔用電話,因為我怕拍嘢會分心,監製讚我專業,所以我收工先拎電話出嚟。」

今次被指跟「人夫」王浩信傳緋聞,江嘉敏表示唔會特別唔開心,因為佢冇睇報道,平時都係正常交談,而且跟同劇女演員都好friend,佢話:「我哋呢個團隊有個谷,有咩都會喺谷度講,比較少私訊。」覺唔覺得自己好無辜?江嘉敏指:「冇乜特別感覺,因為都唔係,所以唔會好sad。」

講番呢個唧花活動,唔知單文柔有冇收過陳展鵬送嘅花?佢好大方咁話:「未到節日,未收到,女仔都鍾意收花,所以我都期待,我都係浪漫型。」收戒指最浪漫喎?佢笑住話:「都係,不過我都係鍾意收花。」講到陳展鵬喺頒獎禮上冇獎,問佢有冇安慰對方?單文柔話:「佢平常心,佢又冇唔開心。今年我哋睇好馬國明同王浩信,佢哋拎,我哋都好開心。」此外,許廷鏗指農曆新年跟情人節好接近,佢話:「冇情人嘅感覺唔會太過嚴重,因為新年氣氛蓋過咗。」

娛聞樂陪你走遍全球追星,即Like「娛果」FB 專頁!
BannerBanner