【跟稿讀都出事】台慶紅地毯頻失言 蔡康年道歉 :講錯就是錯

更新時間 (HKT): 2018.01.24 16:52

大台頒獎禮經已塵埃落定,最佳女配角係咪最佳?落選嘅男配係咪唔抵輸?視帝視后又係咪實至名歸?講還講,都改變唔到賽果。

不過,當晚其實仲有一個焦點人物,就係紅地毯司儀蔡康年。佢喺介紹有份行紅地毯嘅星時,錯漏百出(新聞連結: http://bit.ly/2EZKZHu ),雖然話呢個環節只作網上直播,但都唔少人睇到,鬧爆蔡康年唔專業。

事後有人剪輯咗呢段蝦錄片,喺網上瘋傳轉載,唔少網民都鬧爆蔡康年嘅表現,話佢咁嘅表現令氣氛好尷尬,事緣當晚嘅出場次序,同大會「預定」嘅有出入,好似麥長青同滕麗名及江美儀以《親親我好媽》劇組走上紅地氈,蔡康年將劇名讀成《親親好媽媽》,聽到觀眾搲晒頭;稿入面寫埋江嘉敏個名,但江嘉敏冇(喺呢個組合中)現身,搞到啲人聽到一頭霧水,猛搵江嘉敏去咗邊?稿入面仲有一小節介紹江嘉敏嘅資料,蔡康年全程照稿讀,但人就……

轉個頭,明明係阮兆祥同呂慧儀孖住現身,但蔡康年一下唔為意出場次序有改,讀咗《學是學非》組別嘅梁嘉琪、湯洛雯、劉穎鏇、張寶兒個名,搞到祥仔都打個突,唔敢出場,呂慧儀就喪笑,好彩好快發現出咗錯,即刻改正。而到梁嘉琪佢哋真係出場時,蔡康年又將劉穎鏇讀做梁穎鏇。而湯洛雯最後跟咗王浩信嗰一組人現身。

其他蝦碌嘢,仲有將龔嘉欣讀咗做鍾嘉欣、跟住黃長興同傅嘉莉現身嘅江嘉敏就零介紹,搞到江嘉敏一頭問號;仲有喺楊明出場嘅時候話:「提名過六次嘅楊明」,令到楊明尷尬苦笑。錯嘢不斷,蔡康年喺發現出錯後,通常都會立即跟口改,只係……真係錯得有少少多。

呢條蔡康年蝦碌片由噚日開始碌,各大fb page都有share,或者自行下載再出post,其中一條有成1.4萬like、逾六千幾個留言。群情洶湧。

其實蔡康年喺頒獎禮翌日凌晨,已經喺自己facebook登道歉文,佢留言話:「《對不起》今天作為萬千星輝頒獎典禮紅地氈的司儀,說錯了同事的名字,衷心向大家致歉!懇請大家原諒,無論甚麼原因…講錯就是錯,在此向龔嘉欣的fans、電視劇《親親我好媽》的fans 送上衷心道歉,希望大家原諒! #NeverGiveUp #繼續努力 #我愛TVB #iLOVEyouALL #團隊精神 #恭喜所有得獎藝員同事」

相信佢喺瞓醒一覺後,再留言指:「多謝各位朋友的關心、鼓勵,真感動!雖然未必會平步青雲,但我會繼續默默耕耘」,有網民留言話欣賞蔡康年有錯又敢認,亦有人覺得內部次序有改但通知唔切,所以出錯唔係蔡康年有心。

而佢更加喺《蘋果》即時新聞,報道其失手事件嗰單新聞中,留言致歉,前文同佢自己喺fb度講嘅差唔多,佢另加咗句:「多謝各位網友、巴打絲打的批評,我會好好檢討,努力改進,謝謝大家。」證明佢真係好有心認錯道歉。

娛聞樂陪你走遍全球追星,即Like「娛果」FB 專頁!
BannerBanner