【情人節點過?】倪晨曦同男友歐遊 郭燕光:唔鍾意刻意慶祝

更新時間 (HKT): 2018.01.26 15:33
攝影:仇志德

倪晨曦、郭鶴年細女郭燕光、楊張新悅同趙式芝今日喺灣仔君悅出席國際時尚雜誌活動,佢哋擔任星級評判分享時裝同美容心得。

郭燕光話自己因為工作壓力大加上同男友分手,曾經搞到失眠兼成日喊:「嗰時皮膚好差,所以好留意skincare產品,o依家變咗skincare expert。」郭燕光透露而家同丹麥男友拍左9個月拖,仲好開心話:「即刻靚番晒,不過o依家佢(前男友)揾返我,哈。」

提到就嚟情人節,佢就話自己唔鍾意刻意慶祝:「好似為咗要好開心影相咁,我覺得好假,太大壓力啦。」不過郭燕光就會同男友返丹麥探佢家人,仲話已經見過好多次家長㖭。至於佢有冇帶男友返去見家長?郭燕光話:「因為係外國人,屋企唔係咁鍾意,所以我冇帶呀,唔敢提,好驚。」

早前佢喺中環嘅鋪頭失竊,損失200萬,郭燕光話好激氣,冇諗過嗰個地方保安會咁不足:「o依家同律師商量緊點做,有朋友同我講佢地喺同一個地方嘅鋪都試過咁。呢件事對於我,唔係世界末日,不過對於啲小型公司,就真係好大問題,希望今次可以令佢哋進步啲。」

同場嘅倪晨曦透露平日鍾意簡約風格嘅時裝、首飾,佢話平日會買嘢畀男友V先生:「佢鍾意實際嘢,所以我次次都要深思熟慮,試過DIY音樂盒畀佢。」佢亦試過買內褲畀男友,仲會同自己嘅內衣褲襯番色:「我自己收到貼身用品會覺得好sweet,好close嘅朋友都會送,有時又會當結婚禮物。」另外,情人節倪晨曦話會同V先生喺歐洲過,享受浪漫之旅。

娛聞樂陪你走遍全球追星,即Like「娛果」FB 專頁!
BannerBanner