【韓流】南太鉉領軍辦記招 最想同王家衛合作

更新時間 (HKT): 2018.01.26 20:32

韓國男團WINNER前成員南太鉉,前年11月退團並離開YG事務所,隨後與友人,吉他手Kang Kun Ku、鼓手Jang Won Young及貝司手Solomon Kim組成獨立樂隊South Club,樂隊將於聽晚喺九展開騷,4子今日襲港做準備並到鑽石山舉行記者會。

South Club準時晚上7點現身,率先以廣東話打招呼,南太鉉更用英文表示好耐冇見港迷,立即引起粉絲尖叫。被問到歌曲嘅創作靈感時,南太鉉表示:「靈感來源多數來自電影,不過歌曲都係畀粉絲聽,都可以話創作來源係粉絲。」至於South Club原先喺街頭表演,越嚟越多粉絲到場支持,4子坦言:「其實首次街頭演出前粉絲已經知,冇乜點宣傳過,好多謝粉絲令我哋更多人識,隨住更多粉絲嘅支持,希望喺室內開騷。」不過對於聽日嘅港騷南太鉉就賣關子,話係秘密唔預先透露,南太鉉又稱自己好鐘意香港,嚟緊會喺香港拍新歌MV及新碟專輯封面。

被問到未來大計,4子紛紛表示希望新碟受歡迎及所有人幸福、快樂、健康。之後South Club獲大會送上喻意越唱越好嘅揮春及與小朋友合照,南太鉉見到小妹妹時勁開心,相當有父愛。

South Club表示來港後想去山頂睇夜景,又指自己舒緩壓力嘅方法包括飲酒、瞓覺及睇電影,南太鉉就坦言自己壓力好大,粉絲就大聲尖叫,佢立即賣口乖話聽到粉絲尖叫聲就減咗壓。

4子又表示未來希望多創作主流音樂,等多啲人跟住唱。對於挑戰演技及綜藝節目,南太鉉表示持開放嘅態度,有機會都好想拍,續指:「最想同王家衛導演合作拍音樂電影。」並稱自己最鍾意《阿飛正傳》及《少林足球》 。

完成訪問後,South Club到台下與粉絲影大合照,南太鉉更親民與粉絲握手。

娛聞樂陪你走遍全球追星,即Like「娛果」FB 專頁!
BannerBanner