【白髮look】周星馳現身廣東省政協閉幕會議 網民:我的星爺老了

更新時間 (HKT): 2018.01.28 14:47

好耐冇公開露面嘅「星爺」周星馳,噚日以廣東省政協委員身份出席閉幕會議,之前只係一頭灰白髮嘅星爺,估唔到咁耐冇見,55歲嘅佢已經變咗白頭佬,加上兩條法令紋,網民紛紛慨嘆歲月催人:「我的星爺老了」、「心疼這一束白髮,又白了好多。」

星爺由13年開始擔任廣東政協委員,當年缺席第一次大會,受到官方傳媒嘅批評,連星爺都冇面畀;噚日呢位重量級嘅星爺大駕光臨投票,着西裝戴黑框眼鏡現身,喺中場休息時,受到現場人士熱烈歡迎,好多委員同工作人員都上前圍影,星爺淡定應對,毫無架子滿足大家要求。

現場嘅香港傳媒見到星爺都上前訪問,星爺被問到香港青年應否到粵港澳大灣區發展?佢表示區內有好多機會,要睇吓大家點諗:「對我嚟講喺創意方面發揮空間大咗好多,希望香港青年能藉助發展粵港澳大灣區嘅東風到內地發展。」星爺認為創意好重要,目前好多香港電影選擇到內地取景,佢希望大灣區能從資金、人手、政策方面幫助文創產業發展。星爺表示,目前自己喺內地準備多個項目,內容圍繞電影等文化創意產業:「希望文化創意產業能得到發展。」

娛聞樂陪你走遍全球追星,即Like「娛果」FB 專頁!
BannerBanner