【有真有假】吳彥祖做番建築師?入哈爾濱工業大學進修?

更新時間 (HKT): 2018.02.04 16:00

喺美國讀建築嘅吳彥祖早排喺浙江衛視節目《漂亮的房子》度,夥拍建築師張海翱及幾位藝人,到河北起咗一座公共圖書館,結果圖書館入圍被譽為「建築界奧斯卡」嘅英國皇家建築師學會獎。

點知到咗噚日大陸網瘋傳一段消息,話吳彥祖做完浙江衛視呢個節目後,重燃建築學熱情,會喺今年投入哈爾濱工業大學嘅陳劍飛副院長門下實習,繼續進修建築學。

不過,原來呢單係流料,一位自稱係Link-Arc建築事務所主持建築師兼清華大學副教授陸軼辰,今日凌晨喺微博澄清,話佢應建築雜邀請發表一篇2017年歲末感言及展望未來至2050年嘅文章,由於文章係應哈爾濱工業大學嘅《城市建築》之邀,佢就攞該校嘅建築學院副院長陳劍飛開咗個玩笑,寫道:「2017年,著名演員吳彥祖參與浙江衛視的某節目後,重燃建築學熱情,變身為建築師吳工。因吳工早期在伊利諾伊打下的基本功不太紮實,於2018年投入哈工大陳劍飛副院長門下實習,開始其建築回爐修煉之路……」由於全文以假亂真,虛實難辨,加上吳彥祖設計嘅圖書館又真係入圍「建築界奧斯卡」,一時間都唔知邊句真邊句假。

加上冇Fact check…結果就…集體中伏。

娛聞樂陪你走遍全球追星,即Like「娛果」FB 專頁!
BannerBanner