【好似靚仔咗...】無懼霜凍警告 「精壯」馬國明短袖衫現身《降魔的》慶功

更新時間 (HKT): 2018.02.04 16:25
馬明好精壯,近日氣溫得幾度,佢都係短袖衫出席慶功。(ig圖片)

馬國明今年真係大豐收,愛情事業兩得意,同心穎BB感情穩,早前仲一齊歐遊,睇嚟都好事近。(相關新聞﹕ http://bit.ly/2BgeVwy )

由馬明主演嘅《降魔的》口碑更勝收視,喺台慶頒獎禮仲攞咗「全球網民最喜愛劇集」同「我最喜愛男角色」獎,咁開心,梗係要搞個慶功慶祝一吓。

噚晚喺《降》劇中飾演馬明年輕時代版阿媽嘅阮小儀,就喺ig貼慶功相,台前幕後大合照時,個個都笑容燦爛。而馬明除咗同「小儀媽」影相之外,仲有同老版嘅阿媽謝雪心一齊合照,但「阿爸」金剛就冇嚟到。唔少網民見到張相,都話馬明疑似飲醉酒,因為見佢臉紅紅,仲好「壯」咁係低溫天氣下着短袖衫。

小儀留言﹕「《降魔的》慰勞gathering宴,開心到呢!」同場仲有黃智雯、何遠東、胡鴻鈞、譚嘉儀、趙永洪等,之前編審羅佩清露口風話諗咗續集名叫《降魔的之十字路口》,唔知幾時成事呢?!

娛聞樂陪你走遍全球追星,即Like「娛果」FB 專頁!
BannerBanner