【29歲結婚36歲生仔】黃浩然唔怕早婚趕走fans﹕我又唔紅,都冇嘢輸啦

更新時間 (HKT): 2018.02.11 14:19

黃浩然喺《平安谷之詭谷傳說》擔正做男一,其實拍呢套劇之前,佢患上罕有病貝賽特氏症,休息一段時間後嘅復出之作。黃浩然日前接受梁泰來《1圈圈 星光背後》訪問,佢坦言當時因為拍劇太辛苦,所以捱出怪病。

黃浩然話﹕「記得嗰年我攞咗飛躍進步獎,《公主嫁到》同《義海豪情》重疊咗一個月,我兩套劇都係做男二,基本上一個月有六、七組通告係踩40、50個鐘,能瞓都只得3、4個鐘,基本上係快要死。」捱完兩部劇之後,黃浩然開始發現身體出現問題,口腔痱滋生咗一個月都唔,後來成個口爛晒,後期嚴重到講唔到嘢,佢話﹕「面都開始生痘痘,眼睛血管嘅末端發炎又引致雙眼通紅。我記得入院時係傍晚,做咗一啲內臟嘅化驗,但需要等到早上先知道,嗰一個晚其實幾難捱。如果內臟真係發炎,有多嚴重又是未知之數,嚴重嘅話,真係分分鐘瓜得!後來用類固醇去醫,一找到合適嘅類固醇就好快控制咗病情。」

黃浩然29歲就結婚,與拍拖4年嘅女友莫家嘉(Kaka)結婚,兩人育有兩子,分別係6歲嘅Kayden同4歲嘅Ransley。黃浩然笑言唔怕早婚趕走fans,佢話﹕「我好似做咗『小先峰』咁,我又唔紅,都冇嘢輸啦!搵到對嘅人就結婚。」佢話自己同太太都係傳統嘅人,會要求兒子長幼有序。佢話﹕「過年時,我同太太都會跪低斟茶,我覺得呢種價值觀係值得保留嘅。一個人除咗事業,就係家庭,咁樣先算係一個完滿嘅人。」

娛聞樂陪你走遍全球追星,即Like「娛果」FB 專頁!
BannerBanner