【個女戀上阿媽個情人】MK活地阿倫同活地阿倫撞橋!

更新時間 (HKT): 2018.02.13 21:30
(劇照)

今年賀歲片華語片都算熱鬧,有郭富城嘅《西遊記女兒國》、黃子華嘅《棟篤特工》,唔少得嘅,仲有就係有「MK活地阿倫」之稱嘅葉念琛導演新作——《我的情敵女婿》。

任達華過去甚少拍賀歲片,今次擔正葉念琛新片男主角,故事係講華哥飾演嘅花花公子,鳥倦知還,決定娶後生過佢廿年嘅衛詩雅做老婆。就喺見家長嗰日,發現女朋友嘅繼母,居然係自己嘅初戀情人。

呢條「巧合橋」,撞橋一啲都唔奇,但如果條橋撞正活地阿倫(Woody Allen)呢?就真係令人驚嘆!

活地阿倫新作《奇幻摩天輪》(Wonder Wheel)上周在港上畫,故事講述過氣女星琦溫斯莉,嫁咗畀喪妻嘅旋轉木馬操作員Jim Belushi,諗住安份守己,點知畀佢識到個靚仔救生員Justin Timberlake,婚後出軌。

好景不常,琦溫嘅繼女Juno Temple因為逃避黑社會老公嘅追捕,返去老竇度避難,好衰唔衰同Justin又搞埋一齊。

一睇就知,兩部戲不經不覺都撞咗繼母、繼女愛上同一人嘅大橋,但結局好唔同,宥幾唔同就要入場睇喇。

今日MK活地阿倫葉念琛接受電話訪問,佢話未睇過《奇幻摩天輪》:「邊有時間睇呀,撞咩橋呀?係咩,咁好笑,我嗰個(任達華)係初戀情人喎,邊有撞三角戀啫?事前冇睇過,好想睇喎,我套戲係舊年9、10月拍,真係唔同。你想講我MK Woody Allen同正版 Woody Allen,都幾有趣!」其實呢,《奇幻摩天輪》係前年9月拍0架喇……

《奇幻摩天輪》截至噚日上映5日票房累計17.8萬,貫徹活地阿倫作品叫好不叫座風格。

娛聞樂陪你走遍全球追星,即Like「娛果」FB 專頁!
BannerBanner