【湊個「好」字】幸福原來好簡單 一講前世情人城城話......

更新時間 (HKT): 2018.02.20 16:29

啱啱做咗人夫兼爸爸嘅郭富城,今日佢現身海港城出席狗年新春活動,着住藍色唐裝衫、戴住藍色太眼鏡嘅城城表現風騷,喺台上好開心咁話,今年屋企好熱鬧:「一直都好想有自己寶寶,多咗個女又結咗婚,家庭生活十分開心。以往嘅新年假期其實都好短,今年就特登提早,享受吓家庭樂,做咗爸爸嘅心情到o依家都仲好興奮。」司儀仲問城城狗年有咩願望?阿城即刻好興奮咁話:「追個仔啦!」之後又向現場工作人員大派利是。

之後阿城接受記者訪問,聽到大家祝佢早生貴子,即心情大靚回應:「承你貴言。今年真係特別開心屋企熱鬧咗好多,有家庭、有小朋友,真係好熱鬧。o依家囡囡(Chant)五個月大,一家人都好開心,同未結婚完全係兩個世界,o依家覺得生活同快樂真係好簡單。」

問到佢係咪想追番個仔?阿城話郭媽媽好鍾意:「佢o依家有得抱孫女,但係都成日同我哋講,你睇吓你個女幾得意,快啲追番個仔。佢抱孫女都唔夠,咁我哋好孝順嘅,會盡量努力,不過都要順其自然,希望今年追番個仔啦。」咁想生多幾多個小朋友呀?阿城就話如果太太唔怕辛苦,可以生多啲:「不過o依家個社會,一仔一女都好足夠,不過我自己就覺得小朋友越多越熱鬧。」阿城仲話:「人生已經好圓滿,如果生多個仔就係滿上加滿。」

阿城繼續分享湊女生活,佢話自己有份餵囡囡食糊仔,下一步係希望同佢沖涼,又話怕自己太大力,所以換片就係側邊睇,跟住佢又好開心咁話:「湊佢真係難過跳舞好多,又要o氹佢瞓覺。不過自己希望係開工之前,可以帶佢去公園玩,呢個係我嘅目標。」佢仲話好好奇囡囡會用廣東話叫爸爸先定係用國語叫媽媽先,又話老婆已經講好今年為囡囡收嘅利是,將來留番俾佢做嫁妝。

娛聞樂陪你走遍全球追星,即Like「娛果」FB 專頁!
BannerBanner