【C1頭條】城城找數 將全民利是捐慈善

更新時間 (HKT): 2018.02.21 00:00

郭富城昨日大年初五穿上藍色唐裝衫、戴藍色太眼鏡,風騷現身尖沙嘴的賀年活動。早於24年前,當年只有29歲的城城,接受負責娛樂節目採訪的祝文君訪問,曾在鏡頭前表示:「希望有一日我將來結咗婚,我就派利是,個個都有份,我講過嘅,全港嘅市民都會收到我嘅利是。」事隔24年,但隨着城城結婚,最近被網民翻炒要求他「找數」。

城城昨日接受傳媒訪問時,被問到會否成為「找數真漢子」?他即笑說:「我有睇,都20幾年前,嗰陣時我仲係小朋友,o依家我大個啦,我找數。不過我冇可能逐家逐戶咁派利是,所以我會集合埋全港市民嘅利是捐出去,希望分享呢個福氣,我心目中想捐去UNICEF(聯合國兒童基金會)。」

至於,平日少談家事的城城,未知是否受濃厚節日氣氛影響,心情特別好,在台上主動提及囡囡,他說:「一直都好想有自己寶寶,多咗個女又結咗婚,家庭生活十分開心。」城城又謂:「以往嘅新年假期其實都好短,今年就特登提早,享受吓家庭樂,做咗爸爸嘅心情到o依家都仲好興奮。」司儀問他的狗年願望?城城毫不避忌,興奮說:「追個仔啦!」城城其後受訪時說:「今年特別開心,因為屋企熱鬧咗好多,有家庭、有小朋友,真係好熱鬧。o依家囡囡五個月大,一家人都好開心,同未結婚完全係兩個世界,o依家覺得生活同快樂真係好簡單。」

問到是否真的想追仔?城城坦言母親好鍾意:「佢有得抱孫女,但係都成日同我哋講,你睇吓你個女幾得意,快啲追番個仔。佢抱孫女都唔夠,咁我哋好孝順嘅,會盡量努力,不過都要順其自然,希望今年追番個仔啦!」問到想生幾多個?城城表示如果老婆不怕辛苦,可以生多些,他說:「社會一仔一女都好足夠,不過我就覺得小朋友越多越熱鬧。」

說到囡囡,城城幾乎停不到嘴,甚至分享湊女生活,指自己有份餵囡囡食糊仔,還慈父上身說:「要好細心咁餵,下一步希望同佢沖涼,換片嗰啲我就係側邊睇,因為我驚自己太大力。」他又爆老婆幫囡囡沖涼時,不小心讓囡囡飲水,嚇得他都不敢幫囡囡沖涼。城城又說:「湊佢真係難過跳舞好多,又要o氹佢瞓覺,不過希望喺開工之前,可以帶佢去公園玩,呢個係我嘅目標。」

娛聞樂陪你走遍全球追星,即Like「娛果」FB 專頁!
BannerBanner