【李菁倒斃】李菁晚年環境一般仍疏爽 陳曼娜:真係好難過

更新時間 (HKT): 2018.02.24 18:05

60年代「亞洲影后」的李菁(原名李國瑛),日前被發現倒斃鰂魚涌家中,一代影后黯然謝幕。

陳曼娜(Manna姐)原來曾經跟李菁熟絡,Manna姐67年參加「香港玉女」得季軍入娛樂圈,正正由李菁頒獎。Manna姐今日向《蘋果》表示:「當年我『香港玉女』十幾歲,佢17歲嗰陣已經當選亞洲影后,所以我一直好仰慕佢,當年我聽朋友講,佢住山頂豪宅淨係管理費都要成萬蚊。嗰陣我冇去過佢山頂豪宅,只係朋友食飯碰過一次,到20幾年前再撞番佢,我哋都有一齊玩過,去過佢跑馬地屋企,嗰陣佢已經冇做呢行,生活環境一般,我都覺得有啲欷歔。」

Manna姐又話:「雖然佢生活環境麻麻,但有朋友幫助佢,同佢去卡拉OK玩,佢出手都好疏爽,俾成百蚊啲夥記做貼士,打扮方面都好得宜,仲好有大明星風範,但我同佢都成二十年冇再聯絡。聽到佢喺屋企死咗幾日先俾人發現,真係好難過,覺得好慘,希望佢一路好走。」

今日再有周刊報道指,李菁晚年拮据,無法維持過往生活,朋友相繼支付其生活費,甚至建議李菁復出解決日常所需。但李菁因面子問題,覺得復出一事不可行,甚至謂:「過去鋒頭早就出盡。」稱自己已今非昔比。

而安排復出一事,報道指六嬸方逸華亦知悉,她透過中間人歡迎李菁重回邵氏,但中間人回應要邵氏先付片酬,最終復出一事告吹。

娛聞樂陪你走遍全球追星,即Like「娛果」FB 專頁!
BannerBanner